Желтоқсан оқиғасына биыл 38 жыл. 1986 жылы Алматының қақ ортасында «Қазақты қазақ басқарсын» деген ұранмен алаңға шыққан жастардың ерлігі тәуелсіздіктің алғашқы қадамы болды. Алайда сол ерліктің тарихи бағасы толық берілді ме?
Желтоқсан қаһармандарының бірі — ұлтшыл диссидент Хасен Қожахмет. Ол сол жылы көтеріліске қатысқаны үшін сотталып, кейін ақталды. Бірақ тек ақталу жеткілікті ме?
Ол Ulysmedia-ға берген сұхбатында:
— Желтоқсанға қатысып сотталған бірде-бір азамат Аудандық мәслихаттың депутаты болған жоқ қой, өткен де жоқ. Жолатқан жоқ ешкімді. Бәрі жұмыссыз. Анда-мында тентіреп жүр. Жылдың аяғында бір рет 150 мығ беретін болыпты. Егер қазір Бөкейханов, Байтұрсынов тіріліп келетін болса, оларға да сол екі айлықты береді. Тәуелсіздік үшін күрескендерге арналған заң жоқ, — деді ол.
Хасен Қожахмет 1989-1993 жылдары «Желтоқсан» ұлттық демократиялық партиясын басқарды. 1990-1995 жылдары «Желтоқсан» газетінің бас редакторы болды. Бұл азаматтың және алаңға шыққан жастардың жанкештілігі өз бағасын алып үлгерді ме? Әлде Желтоқсанның тарихи маңызы әлі де толық мойындалмай отыр ма?
Қазір Желтоқсан көтерілісі туралы көп айтылады, бірақ нақты іс пен құрмет кемшін. Тәуелсіздік жолында шейіт болғандардың есімі тек айтулы күндерде ғана емес, күнделікті өмірімізде ұлықталуы керек. Ерліктің бағасы тек сөзбен емес, нақты қолдаумен және тарихи әділ бағамен берілуі тиіс.
Желтоқсан — тәуелсіздікке бастаған ұлы қозғалыс. Бірақ бұл ерліктің шынайы салмағын ұрпақ санасына сіңіру — бүгінгі күннің басты міндеті.
