Астанада 49 шетелдікке заңсыз жолмен Қазақстан азаматтығын алып бергендер сотталды, деп хабарлайды kaztoday.kz.
Астана қаласының екі тұрғыны Қырғызстан, Тәжікстан, Әзірбайжан және Ресей Федерациясынан келген 49 шетелдік азаматқа заңсыз ҚР азаматтығын және уақытша тұруға арналған рұқсаттарды алуына көмектескен.
Сот материалдарына сәйкес, бір сотталушы жалған неке куәліктерін, медициналық анықтамаларды және басқа да құжаттарды дайындаумен айналысса, екіншісі клиенттерді тауып, оларды біріншісімен байланыстырған.
Қылмыстық әрекеттердің нәтижесінде олар әр шетелдіктен 80 мыңнан 1 миллион теңгеге дейін ақша алған.
Мемлекеттік айыптаушы сот процесінде олардың кінәсін толық дәлелдеп шықты. Сот үкімімен бір сотталушы 1 жыл 6 айға бас бостандығынан айырылды. Ал екіншісі 2 жылға бас бостандығынан айыру жазасы тағайындалды.
Сонымен қатар, заңсыз алынған ақшалай қаражаттар:
- 107 мың АҚШ доллары,
- 2,5 миллион теңге,
- 200 мың рубль мемлекет кірісіне тәркіленді.
Үкім заңды күшіне енді.
