Астана тұрғындары кеміргіштер мәселеге айналғанын айтып дабыл қағуда, деп хабарлайды kaztoday.kz.
Астанадағы санитар дәрігерлердің айтуынша, қалада кеміргіштердің көбеюіне қолайлы жағдайлар қалыптасуда. Бұл гидроклиматтық болжамның талдауынан белгілі болды. Есіл және Нұра аудандары кеміргіштердің таралуы бойынша ең проблемалы аймақтар болып отыр.
Санитарлық-эпидемиологиялық бақылау департаментінің бас маманы Айбарша Дүйсенбайқызының мәліметінше, iKomek жүйесіне тұрғындардан 24 өтініш түсіп, подъездер мен жертөлелерде зиянкестердің пайда болғаны хабарланған. Сонымен қатар, 160-тан астам шағым қоқыс контейнерлерінің жанындағы егеуқұйрықтарға, ал 170-тен астамы аулалар мен балалар алаңдарында жүрген кеміргіштерге қатысты тіркелген.
Кеміргіштерден қандай қауіп бар?
Санитарлық дәрігерлер кеміргіштерден әзірге қауіпті аурулар анықталмағанын айтты. Алайда 2025 жылға жасалған болжамдар популяцияның өсу мүмкіндігін көрсетеді. Мамандар бұл қорытындыны гидроклиматтық болжамдарды талдай отырып жасаған.
Кеміргіштер мәселесі Астананың сол жағалауындағы тұрғындар үшін үлкен проблемаға айналды. Мәселен, екі тұрғын үй кешенінің тұрғындары салынып бітпеген көпқабатты үйдің бұл жағдайды ушықтырғанын айтуда.
Әкімдіктің мәліметінше, бұл ғимараттың құрылысы 2016 жылы басталып, кейін тоқтап қалған. Нысанның бұрынғы иесі құрылыс ережелерін бұзып, қоршау орнатпаған. Оған қатысты талап-арыз берілгенімен, кейін меншік иесі ауысуына байланысты іс тоқтатылған. Қазіргі меншік иесі жобаны түзету жұмыстарымен айналысып, дератизация қызметтерін тапсырысқа берген.
Нұра ауданының Қалалық орта сапасын бақылау басқармасының бас маманы Роллан Өскенбаевтың айтуынша, ғимараттың техникалық тексерісі аяқталған, ал дератизация бойынша жұмыстар жүргізілуде. Бұл шаралар кеміргіштер популяциясын азайтуға бағытталған.
2024 жылдың маусым айында «Басқару 2» тұрғын үй кешенінің тұрғындары егеуқұйрықтардың подъездерде де пайда болатынына шағымданған. Кешеннің күзетшісі зиянкестермен күн сайын бетпе-бет келетінін айтады. Тұрғындар бұл мәселенің тез арада шешілуін талап етуде.
