Өңірлік полиция басқармасы күдікті ретінде ұсталған азаматтың ұстау сәтінің видеосын ұсынды, деп хабарлайды Kaztoday.kz.
Ресми мәліметтерге сәйкес, 2025 жылғы 26 қаңтарда сағат 14:50 шамасында Жаңаөзен қаласындағы «Шаңырақ» шағын ауданында полиция қызметкерлері жедел әрекет ету арнайы бөлімінің сарбаздарымен бірлесіп, 2004 жылы туған жергілікті тұрғынды ұстаған. Оған Қазақстан Республикасы Қылмыстық кодексінің 194-бабының 1-бөлігі (Бопсалау) бойынша қылмыстық құқықбұзушылық жасады деген күдік тағылуда.
Күдікті ұсталған кезде оның қолынан ақша тәркіленді. Полицейлердің мәліметінше, тінту барысында қылмысқа дәлел болатын айғақтармен қатар 300 000 теңге табылған. Бұл қаражат заңсыз жолмен алынған деп болжануда.
Тергеу барысында күдіктінің таныс қызын интимдік фотолары мен бейнежазбаларын таратуға қорқытып, 600 000 теңге талап еткені анықталды. Қазіргі уақытта қылмыстық іс қозғалып, тергеу амалдары жүргізілуде.
Ақпарат көзі: Lada.kz
