Елімізде тәрбиешілер мен педагогтарға сұраныс өскен, 36 мыңнан астам бос жұмыс орны белгілі болды, деп хабарлайды Kaztoday.kz.
Қаңтар айында электронды еңбек биржасында білім беру саласындағы мамандарға сұраныс өсті. Жарияланған бос жұмыс орындарының саны 36,8 мыңға жетті. Сонымен қатар, желтоқсанмен салыстырғанда платформадағы түйіндемелер саны 2,5 есе көбейді. Қазір жұмыс іздеп жүрген адамдардың саны 191,9 мыңға жетті.
Еңбек және халықты әлеуметтік қорғау министрлігінің мәліметінше, электронды еңбек биржасындағы бос жұмыс орындарының саны 5,2%-ға азайған. Дегенмен, білім беру саласының мамандарына сұраныс сақталуда. Атап айтқанда, бұл салаға 36,8 мың маман қажет, 11,1 мың адам денсаулық сақтау саласына, ал тағы 11,5 мың адам басқа салаларға сұранысқа ие.
«Қаңтар айында жоғары білікті кадрларға сұраныс күрт өсті – жұмыс берушілер желтоқсан айымен салыстырғанда 16 мыңға көп (+70%) бос жұмыс орнын жариялады. Ал біліктілігі төмен жұмысшыларға сұраныс екі еседен астам төмендеп, 45,7 мыңнан 18,8 мың бос жұмыс орнына дейін азайды. Сонымен қатар, түйіндеме ұсыну жағынан барлық біліктілік топтарында өсім байқалады, әсіресе, біліктілігі төмен жұмысшылар желтоқсан айымен салыстырғанда 60,4 мыңға көп түйіндеме (+338%) жариялады», – делінген министрліктің хабарламасында.
