Ақтөбеде оттық үшін танысының басын кескен күдіктілерге үкім шықты, деп хабарлайды Kaztoday.kz.
Константин Панаскин мен Михаил Лукинге қатысты сот процесі тура бір айға созылды. Ер адамдар өздерінің танысы Денис Кузьменконы өлтіріп, денесін бөлшектегені үшін сотталды.
Оқиға өткен жылдың күзінде болған. Достары Михаил Лукиннің анасының пәтерінде жиналған. Барлығы масайған кезде Панаскин мен Кузьменко арасында жанжал туындаған. Олар қарапайым оттық үшін ұрысып қалған. Даудың үстінде Денис Константинді «сатқын» деп атап, намысына тиген.
Панаскин бұл қорлыққа шыдай алмай, Кузьменконы соққыға жыққан, кейін бірнеше рет пышақтап, өлтіріп тастаған.
Келесі күні Лукин Панаскин өлтірген адамның денесін бөлшектеп, қол-аяғын қаланың сыртына лақтырып, қалған бөліктерін, басын, тоңазытқышқа салып қойған.
Алайда көп ұзамай полиция қылмыскерлерді құрықтады.
Бұл іс Ақтөбе облысының мамандандырылған ауданаралық қылмыстық сотында қаралды. Дүйсенбі күні кешке сот алқасы Панаскинді ҚР ҚК 99-бабының 1-бөлігі («Кісі өлтіру») бойынша кінәлі деп танып, 11 жылға бас бостандығынан айырды. Ал Лукин ҚР ҚК 432-бабы («Аса ауыр қылмысты жасыру») бойынша кінәлі деп танылып, 4 жылға сотталды.
