Көкшетауда зейнеткер алаяқтарға пәтерін 18,5 млн теңгеге сатып жіберді, деп хабарлайды Kaztoday.kz.
74 жастағы әйелді құқық қорғау органдарына көмектесіп жатырсың деп алдап, арнайы операцияға қатысып жатқанына сендірген.
Іс материалдарына сәйкес, 3 ақпан күні жәбірленуші WhatsApp арқылы «бұрынғы басшысынан» хабарлама алған. Ол құқық қорғау органдары барлық (тіпті бұрынғы) қызметкерлерді ақпараттың таралуы мен терроризмді қаржыландыру қаупіне байланысты тексеріп жатқанын айтқан.
Сол күні әйелге өзін Ұлттық қауіпсіздік комитеті мен Ұлттық банктің қызметкері ретінде таныстырған алаяқтар қоңырау шалған. Олар зейнеткерді пәтерін сатуға көндіріп, алаяқтарды қылмыс үстінде ұстау үшін осындай қадам қажет деп сендірген.
Полицияның мәліметінше, жәбірленуші пәтерді 18,5 млн теңгеге сату туралы келісім жасап, риэлтор көмегімен мәмілені рәсімдеген. Кейіннен ол түскен қаражатты толығымен үшінші тұлғалардың шоттарына өзі аударып жіберген. Бұл ретте 30-дан астам қаржылық операция жасап, қаражатты әртүрлі орындардан жіберген.
Қазіргі таңда аталған факт бойынша сотқа дейінгі тергеу амалдары жүргізілуде.
