Жамбыл облысында жол апатынан бір полицей қаза тауып, екіншісі ауруханаға жеткізілді, деп хабарлайды Kaztoday.kz.
Жамбыл облысында орын алған жол-көлік оқиғасы салдарынан бір полиция қызметкері қаза тауып, тағы бірі ауруханаға жатқызылды. Бұл туралы өңірлік полиция департаментінің баспасөз қызметі мәлімдеді.
«11 ақпан күні сағат 19:40-та «Алматы-Ташкент» тас жолының 203-шақырымында Volkswagen Passat маркалы автокөлік жүргізушісі қарама-қарсы бағытқа шығып, жол қауіпсіздігін қамтамасыз етіп жүрген қызметтік автокөлікпен соқтығысты. Жол апаты салдарынан патрульдік көліктегі екі полиция қызметкері түрлі жарақат алып, Қордай орталық аудандық ауруханасына жеткізілді. Өкінішке қарай, Жамбыл облысы полиция департаментінің Патрульдік полиция батальонының аға инспекторы, полиция аға лейтенанты Үшкемпір Абай Бақытбекұлы 12 ақпан күні аурухананың жансақтау бөлімінде көз жұмды», – делінген хабарламада.
Мәліметке сәйкес, полиция аға лейтенанты Абай Үшкемпір ішкі істер органдарында 2017 жылдың 14 желтоқсанынан бастап қызмет атқарған. Ал қазіргі қызметінде 2025 жылдың 6 ақпанынан бастап жұмыс істеген. Ол қызмет барысында тоғыз рет марапатталған.
«Жамбыл облысы полиция департаменті марқұмның туған-туыстары мен жақындарына қайғырып көңіл айтады», – деп мәлімдеді департамент өкілдері.
