Алматы облысында ҰҚҚКБ қызметкерлері бопсалаумен айналысқан топты ұстады, деп хабарлайды Kaztoday.kz.
Қылмыстық топтың мүшелері құрбандарын әлеуметтік желі арқылы іздеп, тапқан.
17 жастағы қыз бала желі арқылы жігітті кездесуге шақырған. Одан кейін аяқасты қыздың «ағалары» пайда болып, жігітті жыныстық қатынасқа түспек болдың деп жала жапқан. Оған зорлық көрсетіп, ақша бопсалаған. Бағалы заттары мен құжаттарын алып тонап кеткен.
Тергеу мәліметінше, қылмыстық схеманың ұйымдастырушысы – Қайназар ауылының 19 жастағы тұрғыны.
– Жедел-іздестіру іс-шаралары барысында полиция қызметкерлері қылмыстық топтың барлық мүшелерін анықтап, ұстады. Олардың үстінен бопсалау фактісі бойынша қылмыстық іс қозғалды. Жалпы саны жеті адам полицияға жеткізілді, оның төртеуі негізгі күдікті ретінде уақытша ұстау изоляторына қамалды. Қазіргі таңда тергеу жалғасып, олардың өзге де қылмыстарға қатысы бар-жоғы анықталуда, – деп хабарлады облыстық полиция өкілдері.
