Қостанай облысында сот көпбалалы әйелдің құқығын қорғап қалды, деп хабарлайды Kaztoday.kz.
Қазақстан Республикасы Еңбек және халықты әлеуметтік қорғау министрлігінің пікірінше, 22 мың теңге артық төленген мемлекеттік жәрдемақы ретінде қайтарылуы тиіс болған.
Іс бойынша жауапкер – төрт немесе одан да көп кәмелетке толмаған баласы бар, көпбалалы отбасының әлеуметтік жәрдемақы алушысы. Оның балаларының қатарында 2006 жылы туған ұлы да бар.
Іс материалдарына сәйкес, 2024 жылдың наурыз айында министрлік жауапкердің баласының колледжде академиялық демалыс алғанын анықтаған. Себебі – оның мерзімді әскери қызметке шақырылуы.
«Жауапкер талапты толық мойындап, жәрдемақы 2024 жылғы 5 наурызға дейін төленгенін, ал ұлы 29 наурызда әскерге шақырылғанын және осыған байланысты оқу орнында академиялық демалыс ресімделгенін көрсетті. Сондай-ақ, ол алған жәрдемақыны балаларды асырау мақсатында пайдаланғанын айтты», – деп хабарлады Қостанай облыстық сотының баспасөз қызметі.
Нәтижесінде сот көпбалалы отбасынан артық төленген жәрдемақыны өндіріп алу туралы министрліктің талабын қанағаттандырудан бас тартты. Соттың пікірінше, «жауапкер талапкерден адал түрде алған 22 000 теңге оның отбасы үшін күнкөріс көзі болған және отбасылық қажеттіліктерге жұмсалғандықтан қайтаруға жатпайды».
Айта кету керек, министрлік аудандық сот шешімімен келіспей, Қостанай облыстық сотына апелляциялық шағым түсірген. Алайда, облыстық сот та министрліктің шағымын қанағаттандырудан бас тартты.
Сот шешімі заңды күшіне енді.
Дереккөз: RATEL.KZ
