Түркістан қаласының әкімі Әзімбек Пазылбекұлы қала тазалығын сақтау мақсатында арнайы тексеру жұмыстарын жүргізді, деп хабарлайды Kaztoday.kz.
Қала аумағындағы бірнеше нысанды аралау барысында кейбір қоқыс тасымалдаушы компаниялар мен жеке тұлғалардың қала сыртына заңсыз қоқыс төгіп жатқаны анықталды.
Әкім бұл мәселеге ерекше назар аударып, нақты тапсырмалар берді: 
— Қала тазалығын сақтау – әрбір азаматтың міндеті. Қоқысты дұрыс өңдеп, белгіленген орындарға ғана шығару қажет. Сонымен қатар, тұрғындар мен кәсіпкерлер экологиялық мәдениетті қалыптастыруға белсене атсалысуы тиіс. Заңсыз әрекеттердің алдын алу үшін жергілікті полиция мен әкімдік қызметкерлері тұрақты бақылау жүргізетін болады, — деді Әзімбек Пазылбекұлы.
Рұқсатсыз қоқыс төгу қоршаған ортаға айтарлықтай зиян келтіріп, тұрғындардың денсаулығына қауіп төндіреді. Осыған байланысты қала әкімдігі құқық қорғау органдарымен бірлесіп арнайы жұмыс тобын құрды. Заңбұзушылық фактілері тіркелген жағдайда қатаң шаралар қолданылады.
ҚР Әкімшілік құқық бұзушылық туралы кодексінің 434-бабының 2-бөлігіне сәйкес, заңсыз қоқыс төккендерге 10 АЕК, ал 505-бабының 2-бөлігі бойынша 2 АЕК көлемінде айыппұл салу қарастырылған. Сонымен қатар, жер қойнауын заңсыз пайдаланғандар қылмыстық жауапкершілікке тартылады.
Қала әкімдігі экологиялық жағдайды жақсарту мақсатында заңсыз қоқыс төгуге қарсы шараларды күшейтіп, жүйелі жұмыстарды қолға алуда. Алдағы уақытта тазалықты сақтау бойынша жаңа бағдарламалар енгізіліп, қоғамдық бақылау жүйесі күшейтіледі.
