Жарылыстан 46 кенші қаза тапты, деп хабарлайды Kaztoday.kz.
ҚР Бас прокуратураның арнайы прокурорлары Ішкі істер министрлігі, Сыбайлас жемқорлыққа қарсы іс-қимыл агенттігі, Қаржылық мониторинг агенттігі және Төтенше жағдайлар министрлігінің қызметкерлері Костенко шахтасындағы жарылысқа қатысты сотқа дейінгі тергеу жүргізді.
Нәтижесінде 106 томнан тұратын қылмыстық іс сотқа жіберілді.
Тергеу барысында анықталғандай, жарылысқа себеп — тау-кен жұмыстары кезіндегі қауіпсіздік ережелерінің жаппай бұзылуы. Көмір өндіру алаңындағы жарылыс, шоғырлануы рұқсат етілген стандарттардан айтарлықтай асып кеткен көмір шаңының жарылыстарының тізбекті реакциясын тудырған. Салдарынан 46 кенші қаза тауып, 28 кенші жарақаттанды.
Қазіргі таңда шахта басшылығы мен инженерлік-техникалық қызметкерлер қатарынан 10 адам қылмыстық жауапкершілікке тартылып, қамауға алынды.
Олар Қылмыстық кодекстің 277-бабының 3-бөлігі бойынша («тау-кен жұмыстары кезінде қауіпсіздік ережелерін бұзу») айып тағылған. 8 жылға дейін бас бостандығынан айыру жазасы қарастырылып отыр.
Іс бойынша 74 адам жәбірленуші ретінде танылды.
