«Мені мүгедек қылды, бірақ әлі ешкім жазаланған жоқ» деген алматылық әйел полицияның әрекетсіздігіне шағымданды, деп хабарлайды Kaztoday.kz.
Алматы тұрғыны Ақжарқын ZTB NEWS-ке өзінің және сіңлісінің қатігездікпен соққыға жығылғаннан кейін полицияның әрекетсіз отырғанын айтты. Оның айтуынша, шабуыл жасағандар құқық қорғау органдарымен байланысы бар.
Оқиға 2024 жылдың 13 тамызына қараған түні Шұғыла ықшам ауданында болған. Ақжарқын кішкентай баласымен үйде болған кезде сыртта шулап жүрген топтан тыныштықты бұзбауды бірнеше рет сұраған. Алайда олар мән бермеген. Кейін олар фейерверк атып, баланы шошытқан.
«Мен полицияға 13-14 рет қоңырау шалуға тырыстым, бірақ ешкім жауап бермеді», – дейді Ақжарқын.
Содан соң сіңлісімен бірге далаға шыққан кезде топтың сыра ішіп отырғанын көрген. Сіңлісі олардың әрекетін видеоға түсіре бастағанда, топтағы бір әйел ашуланып, телефонын ұрып түсіріп, оған шабуыл жасаған. Артынан төбелес басталып кеткен.
«Менің шашымнан сүйреп, бетімнен ұрды, тепті, тістеді. Ақырында есімді жоғалттым», – дейді Ақжарқын.
Оның айтуынша, шабуылға бір ер адам да қатысқан – ол әйелдердің бірінің күйеуі екен.
Жәбірленуші басынан қатты соққы алып, бас миының шайқалуын, көз ұясының төменгі сүйегінің сынуын және көздің сетчаткасының жарылуын алған. Оған екі рет ота жасалып, көз аймағына титан тор орнатылған. Алайда ауру басылмаған, көру қабілеті нашарлап, көз алмасы төмен түсіп кеткен.
Ақжарқынның айтуынша, шабуылдаған әйелдердің күйеулері құқық қорғау органдарында жұмыс істейді. Әйелдердің бірі – мұғалім, екіншісі – жұмыссыз. Ал ер адамдардың бірінің әкесі бұрын Қордай ауданының әкімі болған.
«Аудандық полиция бөлімі қызметкерлері маған қысым көрсетіп, арызымды қайтарып алуға көндіруге тырысты», – дейді Ақжарқын.
Желтоқсан айында іс жабылған. Бірақ Ақжарқын әділдікке жетуге талпынып жүр.
