Қазақстандағы еңбек мигранттарының басым бөлігі – Қытай, Түркия және Үндістан азаматтары, деп хабарлайды Kaztoday.kz.
Бұл жөнінде ҚР Еңбек және халықты әлеуметтік қорғау министрлігінің баспасөз қызметі мәлімдеді.
«Еңбек мигранттарының негізгі шыққан елдері мыналар: Қытай – 4778 адам, Түркия – 1158 адам, Үндістан – 1121 адам, Өзбекстан – 623 адам», – делінген жұма күні таратылған хабарламада.
2025 жылғы 1 ақпандағы жағдай бойынша жергілікті атқарушы органдардың рұқсатымен Қазақстан аумағында 13 072 шетелдік азамат еңбек қызметін атқарып жүр.
«Шетелдік жұмыс күшін (ШЖК) тартуға берілген рұқсаттар келесі санаттарға бөлінеді: бірінші санат – басшылар мен олардың орынбасарлары үшін 568 рұқсат, екінші санат – құрылымдық бөлімшелердің басшылары үшін 2528 рұқсат. Негізгі бөлігі үшінші санаттағы (мамандар) – 4787 адам және төртінші санаттағы (білікті жұмысшылар) – 987 адам. Сондай-ақ маусымдық жұмыстарға 672 адам тартылған, ал корпоративтік ауыстыру аясында 3530 адам жұмыс істеп жүр», – деп нақтылады министрлік.
Министрліктің мәліметінше, қазіргі уақытта Қазақстанда шетелдік жұмыс күшін пайдаланатын 1710 жұмыс беруші бар. Бұл компанияларда 383,1 мыңнан астам қазақстандық азамат еңбек етуде, бұл жалпы жұмысшылар санының 96,6%-ын құрайды.
«Экономикалық қызмет түрлері бойынша ең көп еңбек ететіндер құрылыс саласында – 5343 адам, кен өндіру және карьерлерді қазу саласында – 1360 адам, өңдеу өнеркәсібінде – 1338 адам, әкімшілік және қосалқы қызмет көрсету саласында – 1089 адам, ауыл, орман және балық шаруашылығында – 688 адам», – делінген хабарламада.
Министрлік ішкі еңбек нарығын қорғау мақсатында жыл сайын республикаға тартылатын шетелдік мамандарға арналған квотаны белгілеп, таратады.
«2025 жылға арналған жалпы квота республикадағы жұмыс күшінің санына шаққанда 0,2% көлемінде белгіленді немесе 14,8 мың бірлікті құрайды», – деп нақтылады ведомство.
