Ақтау әкімдігі құны 4,6 млн тұратын қоқыс контейнерінің 192 данасын сатып алмақшы, деп хабарлайды Kaztoday.kz.
Мемлекеттік сатып алу сайтында Ақтау қаласына бағасы 4 642 857 теңге тұратын жерасты қоқыс жәшіктерін сатып алуға арналған лот жарияланған. Онда барлығы 192 контейнер сатып алу жоспарланып отыр.
Lada.kz мәліметінше, «Ақтау қалалық ТКШ бөлімі» ММ үшін тұрмыстық қатты қалдықтарды (ТҚҚ) жер астында жинау және сақтау үшін гидравликалық жүйені сатып алу және орнату» атты лот 28 ақпанда талқылауға шығарылды. Конкурсқа қатысуға алдын ала өтінім 5-13 наурыз аралығында қабылданады.
Жергілікті әкімдік бұл сатып алуға қосымша құн салығын есептемегенде 891 428 570 теңге бөлуді көздеп отыр.
Қоқыс жәшіктері 3 данадан жер астында тұратын еуроконтейнерлер. Сыйымдылығы 1,1 текше метр (1100 литр). Материалы тот баспайтын болаттан жасалған. Өлшемдері – 3560х1800х2700 мм. Корпус типі – ыстықтай илектелген болаттан жасалған дәнекерленген құрылым, – делінген техникалық сипаттамада.
Құжаттарда 192 контейнер орнату үшін қажет материалдарды сатып алу және әр жүйеге 3 евроконтейнерден орналастыру кіреді (жалпы саны – 576 дана) делінген.
Қалалық ТКШ бөлімі қоқыс контейнерлерін қоятын орын әлі нақтыланбағанын хабарлады.
— Контейнерлер халық көп жиналатын орындар немесе көпқабатты тұрғын үйлердің жанына орнатылуы мүмкін. Көбінесе қоқыс уақытында шығарылмай, контейнерлер лық толып, қалдықтар жан-жаққа шашылып жатады. Сондықтан санитарлық талаптарды сақтау және қаланың эстетикалық көрінісін жақсарту мақсатында мұндай контейнерлерді тұрғын үйлердің жанында орнатуды жоспарлап отырмыз, – деп мәлімдеді ТКШ бөлімінің өкілдері.
