«Asar Baspana» қаржы пирамидасы 12,4 млрд теңге шығын келтірді, деп хабарлайды Kaztoday.kz.
Қаржы мониторингі агенттігі мен Бас прокуратура «Asar Baspana» қаржы пирамидасын әшкереледі. Аталған ұйым 86 мыңнан астам адамды алдап, ай сайын 30%-ға дейін табыс уәде еткен. Алайда, шын мәнінде ешқандай бизнес болмаған, төлемдер тек жаңа салымшылардың ақшасы есебінен жүргізілген.
Ұйымдастырушылар 3,8 млрд теңгені иемденіп, бизнес бар деген елес жасау үшін тауарларды сыртқы жеткізушілерден сатып алған. Тінту барысында 1,1 млрд теңгеден астам қаражат пен элиталық автокөліктер тәркіленді. Негізгі күдіктілер қамауға алынды.
Бұған дейін күштік құрылымдар «Асар Баспана» кәсіпкерлік кооперативіне тінту жүргізгені жөнінде ақпарат жариялаған едік. Құқық қорғау органдарының мәліметінше, кооператив басшыларының бірінен Land Cruiser 300, Lexus 570 және Jetour X70 сияқты үш жаңа көлік табылған. Ал Нұрбол Туғанбаевтың інісінің үйін тінту барысында 1 миллиард теңгеге жуық қолма-қол ақша тәркіленді. Басқа кеңселерден тағы 200 миллион теңге және алтын бұйымдар табылған.
