Елімізде су тасқыны қаупі жоғары аймақтар аталды, деп хабарлайды Kaztoday.kz.
Экология және табиғи ресурстар министрі Ерлан Нысанбаев үкімет отырысында Қазақстандағы су тасқыны жөнінде айтты.
Министрдің сөзінше, наурыз, сәуір айлары еліміздің басым бөлігінде жауын-шашын көп түсуі мүмкін. Бұл өз кезегінде су тасқыны қаупінің артуына әсер етеді.
Су тасқыны қаупі жоғары өңірлердің қатарында Ақтөбе, Қостанай, Қарағанды, Ақмола, Солтүстік Қазақстан, Шығыс Қазақстан, Ұлытау және Абай облыстары бар. Ал қауіптілігі орташа өңірлерді Алматы, Жетісу, Жамбыл, Батыс Қазақстан, Атырау облыстары құрап отыр. Тасқын қаупі төмен өңірлер: Павлодар, Маңғыстау, Түркістан және Қызылорда облыстары.
«Биыл «Қазгидромет» алғаш рет әр облыс бойынша егжей-тегжейлі анықтамалар дайындады. Бұл анықтамаларда гидрологиялық бекеттер бойынша су деңгейінің және ағысының күтілетін ең жоғары мәндері, ағын көлемі және сондай-ақ қауіп аймағында орналасқан елді мекендерді көрсете отырып, болжамды басталу күндері көрсетіледі.
Сондай-ақ өткен аптадан бастап «Қазгидромет» апта сайынғы гидрологиялық болжамдарды шығара бастады. Гидрометеорологиялық жағдай күрт өзгеретін болса «Қазгидромет» ескертулерді 2-3 тәулік бұрын хабарлайды», — дейді Ерлан Нысанбаев.
