Астаналық кәсіпкер заңсыз зауыт ашып, тартылған етке малдың тұяғын қосқан, деп хабарлайды kaztoday.kz.
Аталмыш дерек елордалық полицейлердің «Мал ұрлығы» жедел алдын алу шарасы барысында белгілі болған. Заңсыз ет өңдейтін зауыт антисанитарлық жағдайда жұмыс істеген.
47 жастағы тұрғын дайын өнім көлемін арттыру мақсатында шамамен бір тонна ірі қара малдың тұяқтарын өңдеп, оларды тартылған етке қосқан.
«Полицейлер цех ғимаратына кіріп, 1300 ірі қара малдың аяғын, бас сүйегі бар тұтас малдың сойылған денесі, шамамен 100 келі ет пен ет қалдықтарын тауып, тәркіледі», – делінген хабарламада.
Қазіргі таңда жасырын әрі заңсыз ет өндірісін ұйымдастырушыларға әкімшілік хаттама толтырылған.
Ал тәркіленген өнімдердің үлгілері сараптамаға жіберілді.
Тәртіп сақшылары ветеринарлық тексеруден өтпеген ет өнімдерінің тек қылмыстық тегі ғана емес, денсаулыққа қауіп төндіруі мүмкін екенін еске салды.
