Ақтаудың бұрынғы қалалық сот төрағасы Шайдуллин 9 жылға сотталды, деп хабарлайды kaztoday.kz.
Маңғыстау облысында Ақтау қалалық сотының бұрынғы төрағасы Бауыржан Шайдуллинге үкім шықты. Ол пара беруге итермелеу және алаяқтық фактілері бойынша айыпталған еді.
Шайдуллин сотталушыға үкімді жеңілдетіп берем деп 20 миллион теңге сұраған. Алайда, нәтижесінде өзі темір тордың ар жағынан бір-ақ шықты. Сот процесі төрт айға созылды. Бастапқыда істі Ақтау қалалық сотында қарау жоспарланған болатын — Шайдуллин дәл сол жерде жұмыс істеген.
Алайда бұл іске тағайындалған судья Гүлмаржан Әділсұлтани істен бас тартты. Ол бұл шешімін Шайдуллинмен және оның отбасымен достық қарым-қатынаста болуымен түсіндірді.
Осыдан кейін іс Мұнайлы аудандық сотына жолданды.
Бүгін Шайдуллин 9 жылға бас бостандығынан айырылды. Ал оның сыбайласы – сот орындаушысы Ринат Жанахметовке 8 жыл колония жазасы тағайындалды (айыптаулар ұқсас).
Экс-судьяның банктік ұяшығынан табылған 16 миллион теңге мемлекет кірісіне тәркіленді. Жәбірленушілер айыпталушылардан өндіріп алуды сұраған 1 миллион теңге сомасындағы азаматтық талап сотта қараусыз қалдырылды.
Дереккөз: «Орда»
