Алматы қаласында «Елге көмек» қайырымдылық қорының басшысы Ілияс Сариев алаяқтық жасады деген күдікпен ұсталды, деп хабарлайды kaztoday.kz.
Бұл туралы құқықтық кеңесші Нұрсұлтан Орынбековқа сілтеме жасаған Kazinform мемлекеттік агенттігі хабарлады.
«Ілияс Сариев алаяқтық әрекеттері бойынша күдікке ілініп, ұсталды деген ақпарат бар. Оған бірнеше азаматтан арыз түскен. Қазір сол арыздарға байланысты ұсталғаны белгілі», – деп жазды Орынбеков өзінің әлеуметтік желідегі парақшасында.
Полиция департаментінің баспасөз қызметі бұл ақпаратты растады.
Өткен жылы «Biz Birgemiz Qazaqstan» қайырымдылық қорының басшысы Перизат Қайратқа қатысты да қылмыстық іс қозғалған болатын. Ол 3,5 млрд теңгені құрайтын алаяқтық пен қылмыстық жолмен табылған ақшаны заңдастыру фактілері бойынша айыпталып отыр. Тергеу мәліметі бойынша, ол 2021 жылдан 2024 жылға дейін балаларға, Палестинадағы қақтығыстардан зардап шеккендерге және су тасқынынан жапа шеккендерге көмек көрсету үшін қаражат жинап, бірақ бұл қаражатты өзінің жеке шоттарына аударып, көлік, жылжымайтын мүлік және қымбат бұйымдар сатып алуға жұмсаған.
Ілияс Сариев әлеуметтік желілердегі парақшаларында өзін «қазақ Робин Гуды» деп атап, тойлар мен концерттер ұйымдастырушы екенін көрсеткен. Instagram желісінде оның 600 мыңнан астам жазылушысы бар.
«Елге көмек» қорының парақшасына да 400 мыңға жуық адам жазылған. Қор балалар мен қарт адамдарға көмек көрсету үшін қаражат жинаумен айналысқан. Алайда қордың ресми тіркеуден өткен-өтпегені белгісіз. Заңды тұлғалар тізілімінен бұл қор табылған жоқ.
