Қызылордада «Qnet» қаржы пирамидасының бөлімшесін ұйымдастырушылар сотталды, деп хабарлайды kaztoday.kz.
Қызылорда облысында қаржы мониторингі агенттігінің (ҚР ҚМА) баспасөз қызметі хабарлағандай, қаржы пирамидасының «Qnet» құрылымдық бөлімшесін ұйымдастырушылар 6 жылдан 7 жылға дейін бас бостандығынан айырылып, жалпы құны 301 млн теңге болатын жеті пәтер мен Toyota Camry автокөлігі тәркіленді.
«“Qnet” қаржы пирамидасының құрылымдық бөлімшесін ұйымдастыру фактісі бойынша сот үкімі шықты. Тергеуді Қызылорда облысы бойынша ҚМА департаменті жүргізді. (…) Сот үкімімен қаржы пирамидасын ұйымдастырушылар кінәлі деп танылып, оларға 6 жылдан 7 жылға дейін бас бостандығынан айыру жазасы тағайындалды. Сот шешімімен 301 млн теңге тұратын мүлік: елордадағы жеті пәтер мен Toyota Camry көлігі тәркіленді», – делінген хабарламада.
Тергеу мәліметінше, айыпталушылар азаматтарды көпдеңгейлі маркетинг пен электронды коммерцияға инвестиция салуға үгіттеген. Қатысушыларға «QVI tripsaver» деп аталатын жалған туристік карталар мен зергерлік бұйымдарды сатып алуға ұсыныс жасалған. Бұл ретте жаңа клиенттерді тарту – міндетті шарт болған. Қатысушылардың салған қаражаты 840 мыңнан 4 млн теңгеге дейін жеткен.
КазТАГ хабарлағандай, қаржы пирамидасына 51 адам тартылып, жалпы залал көлемі 63 млн теңгеден асты.
Сурет: Gov.kz
