Түркістанда 12 жастағы оқушыны сыныптасы қылқындырып өлтірген, деп хабарлайды kaztoday.kz Otyrar.kz-ке сілтеме жасап.
Қайғылы оқиға 7 ақпан күні болған. Әдеттегідей сабаққа кеткен 12 жастағы Ұлағат Сейдулла сол күйі үйіне оралмаған. Мектеп басшылығы алғашында тек: «Үзіліс кезінде құлап қалды» деп түсіндірген.
Алайда марқұмның анасы Гүлмира Қошееваның сөзінше, ұлының дені сау болған.
— Маған алғашында балалар ондайға барады деп ойлау қиын болды. Кейін шындықты айтқан. Сыныптасы телефон әкеліп, менің балам оны қалжыңдап ұстап алған. Әлгі бала артынан қуып жетіп, тұншықтыра бастаған. Жібермей қойған. Бұл партада болған. Мұғалім сыныпта болмаған. Балам есінен танғанда, оқушылар су құйып, есікті жауып, ешкімді кіргізбеген. Алдымен медбикені, кейін директордың орынбасарын шақырған. Бірақ тым кеш болған, – дейді анасы.
Анасының сөзінше, мектеп басшылығы алғашында баланың денсаулығына кінәрат болды деп жауап берген. Бірақ сот-медициналық сараптама баланың дені сау екенін растап, өлімнің нақты себебі – тұншығу екенін анықтаған.
— Ұлымды сондай күшпен тұншықтырған, ол өз тілінен тұншығып өлген. Бірде-бір мұғалім кешірім сұраған жоқ. Ешкім. Мен баламнан айырылдым, бірақ ешкім жауапқа тартылмады, – дейді Гүлмира Қошеева.
Оқушының өлімінен кейін мектептен төрт қызметкер жұмыстан кеткен. Директор және бір мұғалім өз еркімен кеткен, ал сынып жетекшісі мен директордың орынбасары кейін қайта жұмысқа тұру үшін кәсіподаққа келген.
— Еңбек инспекциясы жұмыстан шығару туралы бұйрықта заңбұзушылықтар барын көрсетті. Біз құжаттарды құқықтық баға беру үшін білім бөліміне жолдадық, дейді А.Оразбаева атындағы мектептің директорының міндетін атқарушы Өмірсерік Кенжеев.
Қылмыстық іс жабылған. Ал күдікті оқушы 12 жасқа толмағандықтан, қылмыстық жауапкершілікке тартылмаған. Тек ата-анасына айыппұл салынған. Тергеу материалдарын таратуға тыйым салынған – бұзғандарға жауапкершілік қарастырылған.
