Қызылордалық полицейлер қаза тапқан әріптесін құрметпен еске алды, деп хабарлайды Kaztoday.kz.
23 маусым – Қазақстан полициясы күніне орай қызметтік борышын өтеу кезінде ерлікпен қаза тапқан полиция лейтенанты Талғат Қозыбаевты әріптестері еске алды.
Жиын барысында Департамент бастығының орынбасары полиция полковнигі Оралбек Омаров бастаған бір топ қызметкер Сырдария ауданына арнайы барып, қызметтік борышын өтеу кезінде қаза тапқан полиция лейтенанты Қозыбаев Талғат Есентайұлының туған жерінде орналасқан мемориалдық стелаға гүл шоқтарын қойды.
Еске алу шарасы барысында бір минут үнсіздік жарияланып, құрметті қарауыл үш рет оқ атты. Бұл — ерлікпен қаза тапқан тәртіп сақшысына деген зор құрметтің белгісі. Мұндай бастамалар полиция қатарындағы ерлік пен адалдықты дәріптеп, кейінгі буынға өнеге болары сөзсіз.
«Ерлік – елге мұра, ұрпаққа үлгі. Осы қасиетті күні адалдық пен еліне деген жанқиярлықтың үлгісін көрсеткен қаһармандардың рухы алдында бас иіп, тағзым етеміз» деді О.Омаров.
