Қызылорда облысы, Сырдария ауданында Шаған ауылдық округінің әкімі Н.Смайлов қызмет бабын пайдаланып, өзі басқаратын мекемеге жер телімін рәсімдеп алғаны үшін айыппұл төлеуге міндеттелді, деп хабарлайды Kaztoday.kz.
Сот құжатында көрсетілгендей, әкім 2024 жылдың 16 тамызында қосалқы шаруашылық жүргізу үшін өзі тұратын мекенжайға жақын орналасқан 0,15 гектар жерді жеке меншігіне беруді сұрап өтініш берген. Алайда ол бұл туралы жоғарғы басшылыққа ескертпеген. Тіпті төрт күннен кейін, яғни 20 тамызда өз-өзіне жер беру туралы шешім қабылдаған.
2025 жылдың мамыр айында бұл жайлы Сыбайлас жемқорлыққа қарсы қызметке хабар түсіп, әкімге қатысты әкімшілік іс қозғалды.
Сотта Н.Смайлов өз кінәсін мойындап, мұндай жағдайда жоғары жаққа хабарлау қажет екенін білмегенін айтып ақталған. Бұл жағдайды сот жазаны жеңілдететін мән-жай ретінде қарастырды.
Нәтижесінде, сот шешімімен оған 275 240 теңге көлемінде әкімшілік айыппұл салынды. Бұл соманы ол қаулы заңды күшіне енген күннен бастап 30 күн ішінде төлеуі тиіс.
