Қазақстан билігі киік санын реттеу мақсатында 800 мың басты табиғи ортадан алу туралы шешім қабылдады, деп хабарлайды Kaztoday.kz.
Бұл туралы Үкімет отырысынан кейін Экология және табиғи ресурстар министрі Ерлан Нысанбаев мәлімдеді.
Министрдің айтуынша, бүгінде еліміздегі киіктердің жалпы саны 3 миллион 978 мыңға жеткен. Оның ішінде:
-
2,3 миллион – Орал популяциясы,
-
1,6 миллион – Бетпақдала,
-
78 мың – Үстірт өңіріне тиесілі.
«Ғалымдардың пайымдауынша, популяцияның шамамен 20 пайызын табиғи ортадан алу қажет. Бұл шамамен 800 мың басқа тең. Олардың ішінде 40 пайызы – аталық, 40 пайызы – аналық, ал қалған 20 пайызы – төлдер», – деді Ерлан Нысанбаев.
Министрлік аталған шараны жүзеге асыру үшін өңірлерде киік етін өңдейтін кәсіпорындар ашу мәселесін де қарастырып жатыр.
Министрлік өкілдерінің айтуынша, бұл шешім:
-
Киік популяциясын тұрақты деңгейде ұстап тұруға,
-
Табиғи тепе-теңдікті сақтауға,
-
Ауыл шаруашылығы жерлерін киіктердің жаппай жайылымынан қорғауға бағытталған.
