Ұлттық экономика министрі Серік Жұманғарин журналистерге қатысты айтқан сөзімен қоғам назарын өзіне аударды. Бұл жолы министр журналистерге Достоевскийдің «Бесы» (Құйын) романын меңзеп, орынсыз қалжың айтқаны үшін сынға ұшырады, деп хабарлайды Kaztoday.kz.
Маусымның 26-сы күні Мәжіліс кулуарында БАҚ өкілдерінің сұрағына жауап берген министр Жұманғарин BES.media порталының атауына тоқталып, Достоевский шығармасына сілтеме жасады.
«Бұқаралық ақпарат құралы қалай аталады? «Бес», иә? Атауы қызық екен. Роман желісі бойынша, шығар, иә? Федор Михайловичтің, солай емес пе? Сіздер немесе «Орда» жазады… «Ордаға» жындар кіріп кетті», — деді министр.
Даудың басы — 23 маусым күні Сенатта өткен брифингте туындаған болатын. BES.media порталының журналисі Жұманғариннен Астана халықаралық қаржы орталығы арқылы 200 миллиард теңгеден астам салық төлеуден жалтарған компанияның атын сұраған. Алайда, министр бұл сұраққа жауап бермей, микрофонын өшіріп, залдан кетіп қалған. Кейін бұл оқиға туралы БАҚ беттерінде сыни материалдар жарық көрді.
Министр сынға жауап берді:
«Жұманғарин брифингті ерте жапты». Тағы кім? Мен брифингті жапқаннан кейін сіз қосымша сұрақ қоюды өтіндіңіз. Солай ғой? Мен брифингті жапқаннан кейін! Неге соны жазбайсыз? Маған сізге дейін екі спикер қойған сұрақты қойып тұрсыз», — деді ол журналистерге.
