Астанадағы Назарбаев университетінде болған студент қыздың өліміне байланысты қылмыстық іс қозғалды, деп хабарлайды Kaztoday.kz.
Қайғылы оқиға 18 маусым күні болған. Назарбаев университетінің студенті жатақханада өлі табылған. Осыған байланысты БАҚ өкілдері Ғылым және жоғары білім министрі Саясат Нұрбекке сұрақ қойған болатын.
Журналистер министрден оқиға студенттер арасындағы жанжал салдарынан болуы мүмкін бе деп сұрады.
«Ештеңе айта алмаймыз. Тергеу аясында қосымша ақпаратты полиция департаменті береді деп келісілген», – деді министр.
Сондай-ақ, шенеуніктің айтуынша, полиция бұл істі Қылмыстық кодекстің 105-бабы бойынша («Өз-өзіне қол жұмсауға дейін жеткізу») тергеп жатыр.
