Қазіргі таңда ауылдық жерлерде кәсіпкерлікті дамыту – елдің экономикалық тұрақтылығын нығайтудың маңызды тетіктерінің бірі. Осы бағытта жүзеге асырылып жатқан «Ауыл аманаты» жобасы ауыл тұрғындарына өз кәсібін бастауға, оны дамытуға және табысын арттыруға нақты қолдау көрсетіп келеді. Бұл бастаманың игілігін көріп отырған жандардың бірі – Қызылорда облысы, Арал қаласының тұрғыны Гүлсая Әбілдаева.
2025 жылы кәсіпкер мемлекет тарапынан 9,8 миллион теңге көлемінде жеңілдетілген несие алып, жолдасы Сабит Атақұловпен бірге пластик өнімдерін өндіретін шағын цехтың жұмысын жаңа деңгейге көтерді. Бұл отбасы үшін кәсіпкерлік – жаңа бастама емес. Олар бұл салада он жылдан астам уақыт еңбек етіп, мол тәжірибе жинақтаған. Дегенмен, өндірісті кеңейтіп, заманауи құрал-жабдықтармен қамтамасыз ету көптен бергі мақсаттарының бірі болатын.
Аталған жоба аясында берілген 2,5 пайыздық тиімді несие сол мақсатқа жетудің нақты жолын ашты. Кәсіп иелері Түркиядан әкелінген «Craft» және «Yilmaz» маркалы заманауи құрылғыларды сатып алып, өндіріс үдерісін толық жаңғыртты. Соның нәтижесінде бұрын ұзақ уақытты қажет ететін жұмыс кезеңдері айтарлықтай қысқарып, сапалы өнімді небәрі 4–5 күн ішінде шығаруға мүмкіндік туды. Бұл тек уақыт үнемдеу ғана емес, өнім сапасының жаңа деңгейге көтерілуіне жол ашты.
Бүгінде цехта өндірілген өнімдерге сұраныс жоғары. Тапсырыстар тек Арал ауданының елді мекендерінен ғана емес, облыстың өзге өңірлерінен, тіпті Ақтөбе аймағынан да келіп түсуде. Қазіргі таңда бұл отбасылық кәсіп екі адамды тұрақты жұмыспен қамтып отыр.
Алдағы жоспарлар да ауқымды. Кәсіпкерлер өндіріс орнын кеңейтіп, жаңа жұмыс орындарын ашуды, өнім көлемін бірнеше есеге арттыруды көздейді. Олардың айтуынша, «Ауыл аманаты» жобасы кәсіптеріне тың серпін беріп, шағын істі ірі өндіріске айналдыруға жол ашқан.
Бұл тек бір отбасының жетістігі ғана емес, ауыл экономикасының дамуына қосылған елеулі үлес. Осындай нақты нәтижелер ауыл тұрғындарының кәсіпкерлікке деген қызығушылығын арттырып, еңбекке деген ынтасын күшейтіп отыр.
Жалпы, Арал ауданында 2023–2025 жылдар аралығында «Ауыл аманаты» жобасы аясында жалпы құны 1 миллиард 113 миллион теңгені құрайтын 179 жоба қаржылай қолдауға ие болған. Өткен жылы 43 жоба жүзеге асса, биыл тағы 85 жобаны іске асыру жоспарлануда.
Мұндай бастамалар ауылдың әлеуметтік-экономикалық дамуына тың серпін беріп, тұрғындардың әл-ауқатын арттыруға ықпал етуде.
