KazToday

Қазақстанда орташа жалақы 486 мың теңгеден асты

Kaz Today — Thu, 03 Sep 2026 10:50:42 +0000

Қазақстанда орташа айлық жалақы 486 388 теңгеге жетті. Алайда нақты жалақы көрсеткіші төмендеген.
Медианалық жалақы 348 415 теңге болды. Бұл көрсеткіш елдегі қызметкерлердің жартысы 348 415 теңгеден жоғары, ал қалған жартысы одан төмен жалақы алатынын білдіреді.
Орташа жалақының медианалық көрсеткіштен шамамен 138 мың теңгеге жоғары болуы жекелеген салалардағы жоғары табыстармен байланысты.
Ал 2026 жылғы 1 қаңтардан бастап Қазақстанда ең төменгі жалақы 85 000 теңге болып белгіленді. Оны есептеу кезінде медианалық жалақы мен еңбек өнімділігі ескеріледі.

«ДостарМедLine»-дағы даулы тіркеу: 2001 жылы қайтыс болған адам 2023 жылы қалай тіркелген?

Kaz Today — Thu, 03 Sep 2026 10:48:12 +0000

Қызылорда қаласындағы «ДостарМедLine» жекеменшік клиникасына қатысты әлеуметтік желіде жазба жарияланды. Жазба авторы- Instagram желісіндегі @nur_ai_tatti парақшасының иесі.

Автордың айтуынша, оның 2001 жылы қайтыс болған әкесі 2023 жылдың қараша айынан бастап «ДостарМедLine» клиникасына тіркелген болып шыққан.

Жазбада автор медициналық ақпарат жүйесінен әкесінің деректерін көргенін көрсеткен. Скриншотта азаматтың «ДостарМедLine» ЖШС-не 2023 жылғы 22 қарашада тіркелгені туралы ақпарат бар.

Автор клиникаға барып, бұл жағдайдың мән-жайын сұрағанын, алайда қызметкерлер оған азаматтың 2023 жылы өзінің электрондық цифрлық қолтаңбасымен (ЭЦҚ) тіркелгенін айтқанын жазады.
Осыған байланысты әлеуметтік желі қолданушысы бірқатар сұрақ көтерген. Атап айтқанда, 2001 жылы қайтыс болған адамның 2023 жылы ЭЦҚ алуы немесе электронды түрде медициналық ұйымға тіркелуі қалай жүзеге асқанына күмән келтіреді.
«2001 жылы қайтыс болған адам 2023 жылы қалай ХҚКО-ға барып немесе биометриядан өтіп, ЭЦП алады?»-деп жазды автор.
Ол құзырлы органдардан жағдайды тексеріп, 2023 жылы азаматтың атына ЭЦҚ кілтінің кім тарапынан және қандай компьютерден немесе IP-мекенжайдан шығарылғанын анықтауды сұраған.
Сонымен қатар жазба авторы, егер деректер расталса, жауапты тұлғаларды заң аясында жауапкершілікке тартуды талап етеді.
Айта кетейік, әлеуметтік желідегі жазбада айтылған деректер әзірге автордың мәлімдемесі ретінде ұсынылып отыр. Аталған жағдай бойынша «ДостарМедLine» клиникасының және уәкілетті органдардың ресми түсініктемесі қажет.
Парақша: Instagram- @nur_ai_tatti

Жамбыл облысында сәбиін қоқыс жәшігіне тастаған әйел ұсталды

Kaz Today — Thu, 03 Sep 2026 06:14:33 +0000

Жамбыл облысында жаңа туған қызын қоқыс контейнеріне тастап кеткен әйелдің кім екені анықталды. Оқиғаға қатысты полиция тергеу жүргізіп жатыр.Құқық қорғау органдары сәбиді тапқаннан кейін оқиғаға қатысы бар адамды анықтау үшін жедел-іздестіру және тергеу жұмыстарын жүргізген. Нәтижесінде бірнеше сағат ішінде баланың анасы анықталып, полиция бөліміне жеткізілді.

Тергеу барысында әйел өз әрекетін мойындаған.

Полиция департаментінің мәліметінше, қазір оқиғаның барлық мән-жайы анықталып жатыр.

«Жан-жақты және толық сотқа дейінгі тергеп-тексеру нәтижелері бойынша тиісті процестік шешім қабылданады», – делінген Жамбыл облысы Полиция департаментінің хабарламасында.

Сотқа дейінгі тергеу қорытындысы бойынша әйелдің әрекетіне құқықтық баға беріледі.

Пышақ ұстаған әйел шабуыл жасап, вице-президент қаза тапты

Kaz Today — Wed, 02 Sep 2026 16:07:08 +0000

Нью-Йорктегі Таймс-скверде 31 тамыз күні пышақ ұстаған әйел бірнеше адамға шабуыл жасаған. Оқиға салдарынан 32 жастағы Bank of America вице-президенті Эрин Пьяченти қаза тауып, тағы бір ер адам жарақат алған.

Алдын ала мәлімет бойынша, 49 жастағы Памела Сиснерос екі пышақпен адамдарға шабуыл жасаған. Кейін ол қолындағы пышақтарымен полиция қызметкерлеріне қарай бет алған.
Куәгерлердің айтуынша, полиция қызметкерлерінің бірі алдымен электрошокер қолданған. Алайда әйел тоқтамаған соң, оған оқ атылған.
Оқиға кезінде қалған полиция қызметкерлері қару қолданбаған. Бұл жағдай әлеуметтік желілерде қызу талқыланып, қолданушылар полицияның әрекетіне қатысты түрлі пікір білдірген. Кейбірі әйелді бірнеше қызметкердің арт жағынан қимылсыздандыруына болар еді деп жазды.
Қазіргі уақытта оқиғаның барлық мән-жайы анықталып жатыр. Тергеу жалғасуда.

Дәрігер қабылдауына кезек қысқарды: жаңа тәртіп енгізілді

Kaz Today — Wed, 02 Sep 2026 15:43:19 +0000

Денсаулық сақтау министрлігі учаскелік дәрігерлердің пациент қабылдау уақытын ұлғайтты. Бұған дейін дәрігерлер қабылдауға 4 сағат бөлсе, қазір бұл уақыт 6 сағатқа дейін артты.

Министрліктің мәліметінше, соның нәтижесінде дәрігерге жазылуды күту мерзімі 5-7 күннен 1-3 күнге дейін қысқарған.
Сонымен қатар азаматтарға дәрігер қабылдауына 60 күнге дейін алдын ала жазылуға мүмкіндік берілді. Бұған дейін емханалардағы қабылдау кестесі негізінен екі аптаға ашылатын.
Ал шұғыл жағдайдағы пациенттерге медициналық көмек көрсету үшін емханаларда 680 арнайы кабинет жұмыс істейді.

Отандық вагон жасау саласын дамыту мәселелері талқыланды

Kaz Today — Thu, 27 Aug 2026 05:38:11 +0000

ҚР Премьер-Министрінің бірінші орынбасары Нұрлыбек Нәлібаевтың төрағалығымен отандық вагон жасау саласының өзекті мәселелері талқыланған кеңес өтті.
Жиынға мемлекеттік органдардың, «Қазақстан темір жолы» ҰК» АҚ өкілдері, сондай-ақ Атырау вагон жасау зауыты, «ЗИКСТО» және «Семей машина жасау» АҚ басшылары қатысты.
Кеңесте кәсіпорындардың қазіргі өндірістік жағдайы, өндірістік қуаттардың жүктелуі және алдағы даму жоспарлары қаралды. Негізгі назар кәсіпорындарды тұрақты әрі ұзақмерзімді тапсырыстармен қамтамасыз етуге, өндірісті дамытуға және қазақстандық қамту үлесін арттыруға аударылды.
Мемлекет басшысы Қасым-Жомарт Кемелұлы Қазақстанның транзиттік әлеуетін тиімді пайдаланып, елімізді Еуразияның көлік хабына айналдырудың маңызын атап өткен болатын. Осы бағытта заманауи, қауіпсіз әрі жолаушыларға қолайлы вагондар өндірісін дамыту маңызды.
Жиында отандық вагон жасау саласында өндірістік кооперацияны күшейту қажеттігі айтылды. Шикізат пен материал жеткізушілерден бастап, құрамдауыш өндірушілер мен сервистік компанияларға дейінгі тұрақты өндірістік тізбек қалыптастыру мәселесіне назар аударылды.
Сондай-ақ вагон жасау кәсіпорындарының айналасында өнеркәсіптік кластер қалыптастырудың маңыздылығы атап өтілді. Бұл өндіріс көлемін арттыруға, жаңа жұмыс орындарын ашуға және отандық кәсіпорындардың бәсекеге қабілеттілігін күшейтуге мүмкіндік береді.
Кеңес қорытындысы бойынша мемлекеттік органдар мен мүдделі ұйымдарға саланы одан әрі дамыту, отандық өнімге басымдық беру, қазақстандық қамту үлесін арттыру және өндірістік кооперацияны кеңейту жөнінде тиісті тапсырмалар берілді.

Ат байланған арқанға соғылып, 13 жастағы қыз қаза болды

Kaz Today — Wed, 26 Aug 2026 11:04:12 +0000

Риддерде қайғылы жол-көлік оқиғасы болды. 13 жастағы қыз мототехникамен жүріп келе жатып, үй маңында байлаулы тұрған аттың керілген арқанын байқамай соққан.

Салдарынан жасөспірім ауыр жарақат алып, оқиға орнында қаза тапты.

Шығыс Қазақстан облысының полиция департаментінің мәліметінше, мототехникада 13 жастағы қызбен бірге 15 жастағы жолаушы да болған. Ол түрлі жарақаттармен ауруханаға жеткізілді.

Куәгерлердің айтуынша, қайғылы жағдайға ат байланған керілген арқан себеп болған.

Қазіргі уақытта оқиғаның мән-жайы анықталып жатыр.

Ғасыр шпаргалкасы: 11 қаламға тұтас бір пәнді сыйғызған студент

Kaz Today — Sun, 23 Aug 2026 05:08:17 +0000

Испаниядағы Малага университетінің студенті қылмыстық-процессуалдық құқық пәнінен емтихан тапсыру үшін ерекше шпаргалка дайындаған. Ол 11 BIC қаламының мөлдір пластик қабатына ине арқылы микроскопиялық қаріппен бүкіл оқу материалын ойып жазып, әр қаламды жеке тақырыпқа арнап бөлген.

Алайда мұқият дайындалған жоспар іске аспады. Емтихан кезінде оқытушы студенттің шпаргалкасын байқап, барлық қаламды тәркілеген. Соның салдарынан ол емтиханнан өте алмай қалған.

2022 жылы университет оқытушысы Йоланда де Лукки тәркіленген қаламдардың суретін әлеуметтік желіде жариялап, оларды «университет реликвиясы» деп атады. Көпшілік болса, мұндай еңбекті шпаргалкаға емес, сабақты оқуға жұмсағанда нәтижесі жақсырақ болар еді деген пікір білдірді.

«Қымбат смартфонға бола бір отбасының үш мүшесі қаза тапты».

Kaz Today — Sun, 23 Aug 2026 05:06:53 +0000

Жергілікті ақпарат көздерінің мәліметінше, Кунал есімді жас жігіт шамамен үш сағат бойы жардың ең шетінде тұрған. Оны райынан қайтару үшін туыстары, ауыл тұрғындары, полиция және құтқарушылар үздіксіз келіссөз жүргізген.

Times of India басылымының хабарлауынша, жігіт ата-анасының өзіне қымбат смартфон алып беруден бас тартуына байланысты қатты күйзеліске түскен. Тіпті ауыл басшысы оны аман алып қалу мақсатында өз есебінен iPhone сыйлап беруге уәде еткен.

Алайда шешуші сәтте ұлын құтқаруға ұмтылған әкесі оған жақындаған кезде Кунал аяғын тайдырып, жардан құлап кеткен. Әкесі де тепе-теңдігін жоғалтып, ұлымен бірге төменге құлаған. Осы сұмдықты өз көзімен көрген анасы да артынша жардан құлап кеткен.

Қазіргі таңда полиция қайғылы оқиғаның нақты себептері мен болған жағдайдың толық ретін анықтап жатыр.

Бұл оқиға эмоциялық күйзелістің салдары қаншалықты ауыр болуы мүмкін екенін және жастардың психологиялық саулығына дер кезінде қолдау көрсетудің маңызын еске салады.

«Орталық – Батыс» жобасы бақылауда

Kaz Today — Wed, 19 Aug 2026 07:40:10 +0000

Қазақстан Республикасы Премьер-Министрінің бірінші орынбасары Нұрлыбек Нәлібаевтың төрағалығымен «Орталық – Батыс» автожол жобасын іске асыру мәселелері бойынша кеңес өтті.

Жиынға Көлік, Қаржы, Ұлттық экономика, Әділет министрліктерінің, ҰҚК Шекара қызметінің, «ҚазАвтоЖол» ҰК» АҚ және мердігер ұйымдардың өкілдері қатысты.
Кеңесте жобалау және құрылыс-монтаждау жұмыстарының барысы, жер учаскелерін бөлу мен қаржыландыру, сондай-ақ автомобиль өткізу пункттерін жаңғырту мәселелері талқыланды.
Сонымен қатар республикалық маңызы бар жолдарды алдағы күзгі-қысқы кезеңге дайындау жайы қаралды. Жауапты органдарға қажетті техникалар мен тайғаққа қарсы материалдарды алдын ала әзірлеу тапсырылды.
Кеңес қорытындысымен Нұрлыбек Нәлібаев проблемалық мәселелерді жедел шешу, құрылыс сапасын бақылау, ведомствоаралық үйлестіруді күшейту және белгіленген мерзімдерді сақтау жөнінде нақты тапсырмалар берді.