Димаш Қазақстандағы сыбайлас жемқорлықпен күреске атсалысады, деп хабарлайды Kaztoday.kz.

Қазақстан Республикасы Сыбайлас жемқорлыққа қарсы іс-қимыл агенттігінің төрағасы Асхат Жұмағали Қазақстанның халық әртісі, халықаралық деңгейдегі әнші, композитор және мультиинструменталист Димаш Құдайбергенмен кездесті.

Агенттік хабарламасында айтылғандай, кездесу барысында Асхат Жұмағали қонақты елімізде сыбайлас жемқорлықтың алдын алу бойынша қабылданып жатқан шаралармен, ашықтықты арттыруға және заңдылық қағидаттарын нығайтуға бағытталған заманауи әдістермен таныстырды. Сондай-ақ, агенттіктің елде сыбайлас жемқорлыққа қарсы мәдениетті қалыптастыруға ықпал ететін негізгі бағыттарын баяндады.

Асхат Жұмағали өнердің қоғамда сыбайлас жемқорлыққа қарсы мәдениетті қалыптастыруда маңызды рөл атқаратынын атап өтті. Оның айтуынша, өнер адалдық пен әділдікке тәрбиелеп, адамдардың дүниетанымына әсер етіп, парасаттылық қағидаттарын нығайтуға ықпал етеді. Антикор төрағасы қоғамда сыбайлас жемқорлыққа мүлдем төзбеушілікті қалыптастыру үшін алдын алу және профилактикалық жұмыстарға ерекше назар аудару қажеттігін баса айтты.

Өз кезегінде Димаш Құдайберген агенттік тарапынан атқарылып жатқан жұмыстарға қолдау білдіріп, болашақ ұрпақтың жарқын болашағы үшін сыбайлас жемқорлыққа қарсы күреске өз үлесін қосуға дайын екенін жеткізді.

Кездесу барысында тараптар қоғамда заңдылық пен тәртіп қағидаттарын насихаттауға бағытталған бірлескен жобаларды жүзеге асыру мүмкіндіктерін талқылады. Бұл бастамалар сыбайлас жемқорлық деңгейін төмендетуге және мәдени-ағартушылық шаралар арқылы парасаттылық қағидаттарын кеңінен таратуға бағытталмақ.