2018 жылы мектеп қызметкері өндірістік жарақат алып, мүгедектікке шыққан. 2024 жылы ол тағы да жұмыс орнында екінші рет жарақат алып, қазіргі уақытта аудандық ауруханада төсек тартып жатыр. Дегенмен, еңбек жарақаты бойынша тиісті өтемақыны алу мәселесі үлкен қиындықтарға тап болған.

Гульсим есімді желі қолданушысы мектеп басшылығы мен аудандық білім бөлімі жауапкершіліктен жалтарып, қаржылық төлемнің тек сот арқылы шешілетінін алға тартып отырғанын жазды.

Қазақстан Республикасының еңбек заңнамасына сәйкес, жұмыс орнында жарақат алған қызметкерлерге тиісті өтемақы төленуі тиіс. Алайда, жарақат алған қызметкердің жұбайы, сегіз баланың анасы, өз құқығын қорғау үшін заңгер жалдап, сот органдарына жүгінуге мәжбүр болды. Бірақ сот жүйесіндегі бюрократия процесті созып, әділетті шешімге жетуді қиындатып отыр.

Жарақат алған қызметкердің жұбайы өз жұмысын жалғастырып жүргенімен, ол мекеме тарапынан психологиялық қысымға ұшырап отыр. Мектеп директоры мен шаруашылық бөлім басшысы оған әртүрлі себептермен ескерту жасап, жұмысын қиындатуға тырысқан. Бұл әрекеттер көпшіліктің наразылығын тудырып отыр. Желіде «қиын жағдайда қалған қызметкерге көмектесу орнына оны қудалау орын алуда» деген пікірлер таралуда.

Қызметкердің өтемақы алуға берген арызын қарастырған Қармақшы аудандық білім бөлімі қателіктерге толы құжат әзірлеген. Атап айтқанда, қызметкерге тиесілі 40%-дық өтемақы нақты көрсетілмеген. Ал құжаттың өзі басқа мектептің (№30 мектеп) атымен басталып, кейін №121 мектепке қатысты жалғасқан. Ал, мөр орнына үшінші бір мектептің мөрі қойылған. «Мұндай қателіктер білім беру мекемелеріндегі басқарушылық сапаның төмендігін және жауапсыздықты айқын көрсетеді», – дейді желі қолданушылары.

Гули Гул (Гульсим) есімді автор кәсіподақ ұйымдарының әрекетсіздігін де айтқан. Мекемеде кәсіподақ (профсоюз) ұйымдары жұмыс істейді, бірақ олардың негізгі міндеті – қызметкерлердің құқықтарын қорғау болса да, бұл жағдайға араласпаған. «Кәсіподақ тек ай сайынғы жарна жинаумен шектеліп, қызметкерлердің мүддесін қорғауға құлықсыздық танытып отыр» дейді жазба авторы.

Жұмыс жарақатының ақысын сот арқылы алу мүмкін екені айтылса да, сот органдары арызды түрлі себептермен қабылдамай отыр. Қазіргі уақытта заңгерлер көмегімен мәселе сот арқылы шешілуде.