шенеунік — KazToday

Әлеуметтік осал топтарға арналған тұрғын үйдің ақшасын жымқырған шенеунік ұсталды

KazToday — Thu, 22 May 2025 11:53:04 +0000

Тараз қаласы құрылыс бөлімінің басшысы 4 жылға сотталды, деп хабарлайды Kaztoday.kz.

Шенеунік әлеуметтік осал топтар үшін салынатын көпқабатты тұрғын үйдің ақшасын жымқырған деп айыпталуда.

Тараз қаласының соты қалалық құрылыс бөлімінің басшысы Н. Қалдыбаевты, сондай-ақ мердігерлік ұйымдарының өкілі О. Ерболатұлын соттады.

О.Ерболатұлы халықтың әлеуметтік осал топтары үшін көппәтерлі тұрғын үйлердің құрылысына бөлінген бюджет қаражатын жымқырғаны үшін кінәлі деп танылды, ал Қалдыбаев мердігерлердің мүддесі үшін орындалған жұмыстардың жалған актілеріне қол қойып, ақша аударған. Олардың қылмыстық қызметінің нәтижесінде мемлекетке 519 млн теңгеден астам шығын келтірілді, деп мәлімдеді Сыбайлас жемқорлыққа қарсы іс-қимыл агенттігі.

Сот Қалдыбаевқа 4 жыл, Ерболатұлына 6 жыл бас бостандығынан айыру жазасы тағайындап үкім шығарды.

Сот актісі заңды күшіне енген жоқ.

170 миллион: Экс-депутат мемлекеттің ақшасын казиноға салып жіберген

KazToday — Mon, 17 Mar 2025 10:09:33 +0000

Алматы облысында экс-депутат мемлекет қаржысын құмар ойындарға құртқаны белгілі болды, деп хабарлайды Kaztoday.kz.

Алматы облысы Қарасай аудандық мәслихатының экс-депутаты 2 айға қамауға алынды. Қазіргі уақытта тергеу жұмыстары жүріп жатыр.

Шенеунік мемлекеттен 474 млн теңге заңсыз субсидия алған деген күдікке ілініп отыр.

Қаржылық мониторинг агенттігінің мәліметінше, бұл үшін жалған келісімдер мен төлем құжаттарын пайдаланған.

Осы ақшаға Алматы қаласынан екі бөлмелі пәтер және қымбат көлік сатып алған.

Ал 170 млн теңгені Қонаев қаласындағы казиноға құртқаны белгілі болды.

Ақтау әкімінің орынбасары қызметке тағайындалғаннан кейін екінші күні жұмыстан кетті

KazToday — Thu, 13 Mar 2025 09:14:45 +0000

Ақтау әкімінің орынбасары қызметке тағайындалғаннан кейін екінші күні жұмыстан кетті, деп хабарлайды Kaztoday.kz.

Әсет Шопанов Ақтау қаласы әкімінің орынбасары болып тағайындалған соң келесі күні жұмыстан шығып кеткен. Жергілікті әкімдіктің баспасөз қызметінің мәліметінше, Әсет Шопанов Ақтау әкімі орынбасарының қызметінен өз еркімен босатылған.

“Әсет Шопанов 3 наурызда Ақтау әкімінің орынбасары қызметіне тағайындалды. Келесі күні, 4 наурызда ол жұмыстан шықты»,-делінген баспасөз хабарламасында.

4 наурызда БАҚ шенеуніктің бұған дейін мас күйінде көлік жүргізгені үшін 15 тәулікке қамалғанын және қатаң сөгіс алғанын хабарлаған болатын.

МЕМЛЕКЕТ ҚАРЖЫСЫН ЫСЫРАП ЕТКЕН ШЕНЕУНІК СОТТАЛДЫ

KazToday — Fri, 27 Dec 2024 16:53:29 +0000

Қордай аудандық сотында «ҚазАвтоЖол» Жамбыл облыстық филиалы басшысының орынбасары Д. Тультаев, «ДорСтрой» ЖШС мердігерлік ұйымы жобасының жетекшісі У. Құрбанов және «Алматы Сапа Инжиниринг» ЖШС техникалық қадағалау сарапшысы Д. Мұсақұлға қатысты үкім шығарды, деп хабарлайды Kaztoday.kz.

Тергеу барысы анықтағандай, сотталушылар қазақ-қырғыз шекарасындағы «Қордай» өткізу пунктін салу, кеңейту және реконструкциялау кезінде 296 млн теңгеден астам бюджет қаражатын ысырап еткендері дәлелденген.

Яғни, мемлекет қаржысын жымқыру орындалмаған жұмыстар актілеріне қол қою, сол жұмыс түрлеріне екі есе ақы төлеу, жабдықтың құнын асыра бағалау және заттарды аз жеткізу жолымен жүзеге асырылған.

Сот үкіміне сәйкес, Тультаев пен Құрбановқа тиісінше 10 жыл мерзімге дейін жол-құрылыс жұмыстарымен және құрылыс жұмыстары саласындағы кәсіпкерлік қызметпен айналысу құқығынан айырыла отырып, әрқайсысы 8 жыл бас бостандығынан айырылды.

Сонымен қатар, сот шешіміне сәйкес Мұсақұл сәулет, қала құрылысы және құрылыс қызметі саласында 10 жыл мерзімге инжинирингтік қызметтер көрсетумен айналысу құқығынан айырыла отырып, 7 жылға бас бостандығынан айырылды.

Сот актісі заңды күшіне енген жоқ.