Сотқа жүгінген – ұлы. Ratel мәліметінше, ол әкесінен өзі тұрған үйге жөндеу жұмыстарын жүргізгені үшін ақшалай өтемақы талап етті.

Сот барысында 2017 жылы жауапкер (әке) ұлы мен оның отбасына өзінің бос тұрған үйіне көшіп келуге рұқсат бергені анықталды. Алайда үйдің жағдайы мәз болмаған, сондықтан ұлы әкесінің келісімімен үйдің өзін, шаруашылық құрылыстарын және қоршауын жөндеуден өткізген. Ол бұл үйде тегін тұрған.

Жеті жылдан кейін жауапкердің денсаулығы нашарлап, ауылда тұру қиындай бастағандықтан, ол Алтай қаласына көшіп, пәтер сатып алуды ұйғарады. Сол кезде ұлы әкесіне үйді сатып, түскен қаражатты жөндеуге кеткен шығынға сәйкес бөлісуді немесе үйдің жағдайын жақсарту үшін жұмсаған 1 202 600 теңгені қайтаруды ұсынады. Бірақ әкесі бұл ұсынысқа таңғалып, келіспеген.

«Үйдің жағдайын жақсарту үшін жасалған барлық жұмыстар бөлінбейтін жақсартулар болып табылады, яғни оларды жай ғана алып тастау мүмкін емес, өйткені олар жылжымайтын мүліктің бір бөлігіне айналады. Егер оларды бөлшектеуге тырысса, мүлікке зиян келуі мүмкін. Сот барысында тараптар татуласу рәсімдері арқылы өзара келісімге келіп, сот медиациясы аясында дауды реттеу туралы келісім жасады. Бұл келісім сот шешімімен бекітіліп, іс жүргізу тоқтатылды», – деп мәлімдеді ШҚО сотының өкілдері.

Соттың қаулысы заңды күшіне енді.

Фото: depositphotos.com.

«Мемлекет басшысының Жарлығымен Нұрымбет Аманұлы Сақтағанов Шығыс Қазақстан облысының әкімі лауазымына тағайындалды», – делінген ақпаратта.

Нурымбет Аманұлы 1970 жылы Түркістан облысында дүниеге келген. Қорқыт Ата атындағы Қызылорда мемлекеттік университетін, Мәскеу мемлекеттік экономика, статистика және информатика университетін, С.Аманжолов атындағы Шығыс Қазақстан мемлекеттік университетін бітірген.

Еңбек жолын 1992 жылы Қызылорда облысының Сырдария ауданындағы №172 орта мектепте оқытушы ретінде бастаған. Әр жылдары мемлекеттік қызмет, соның ішінде кеден органдарында жауапты басшылық қызметтерде болған.

ШҚО әкімінің орынбасары қызметінде Даниал Ахметовтің сенімді көмекшісі әрі Қызылорда облысының әкімі Нұрлыбек Нәлібаевтың жақын серіктесі болды. Жаңа тағайындауға дейін ШҚО әкімінің орынбасары қызметін атқарған.

Айта кетейік, оның алдындағы әкім Ермек Көшербаев вице-премьер болып тағайындалды.

Шығыс Қазақстан облысы, Серебрянск қаласындағы девиантты мінез-құлықты балаларға арналған арнайы мектептен төрт тәрбиеленуші қашып кетті.

9-10 сыныптың оқушылары өрт шығу есігін бұзып, мектеп аумағынан шығып кеткен. Бірнеше сағат өткен соң, әлеуметтік желілерде олардың тоңып, көмек сұрап жатқан видеосы пайда болды. Жасөспірімдер қоғамдық дәретханада жасырынған, олар суықтан қолдарының үсігенін айтып, көмекке шақырған. Қашқын балалардың үстінде қыстық сырт киім мен қолғап болмаған.

Аязда олар үш сағаттай отырған. Кейін барлығын дәрігерлер тексеруге алып кетті, олардың екеуінде үсік белгілері анықталған.

Әлеуметтік желі қолданушылары оқушылардың қашуына мектеп қызметкерлерінің қатыгез қарым-қатынасы, сонымен қатар тәрбиеленушілерге көрсетілетін қорлық пен мазақ себеп болуы мүмкін деп болжап отыр.

Оқиғадан кейін облыстық білім басқармасы мен өңірлік бала құқықтары жөніндегі уәкіл баспасөз жиынын өткізді. Қазіргі уақытта екі тәрбиеленуші мектеп өкілі мен полиция қызметкерлерінің қатысуымен түсініктеме беріп жатыр.

«Бұл – жабық типтегі мекеме, мұнда шектеулі кеңістікте қалу балалар үшін оңай емес», – дейді өңірлік омбудсмен Ақсана Каленова.

Оның айтуынша, бұған дейін арнайы мектепке қатысты ешқандай шағым түспеген. Желтоқсан айында анонимді сауалнама жүргізілгенімен, ешбір тәрбиеленуші зорлық-зомбылық туралы хабарламаған.

«Қашып кеткен балалардың ата-аналары бала құқықтары жөніндегі уәкілге тікелей жүгінуге құқылы. Алайда олар әзірге байланысқа шыққан жоқ», – деді Каленова.

Сонымен қатар, ол балалардың мектептен қашу фактісінің өзі олардың құқықтарының бұзылғанын білдіруі мүмкін екенін атап өтті. Қазіргі таңда оқиға бойынша тергеу жүріп жатыр.

Айта кетейік, өткен қараша айында Павлодар облысындағы балалар үйінде зорлық-зомбылық оқиғалары жиілегені туралы хабар тараған еді.