Оның айтуынша, отбасы институтының әлсіреуі ұлт болашағына кері әсер етеді, деп жазады shyn-ar.kz ақпараттық порталы.

— Бұл мәселенің шешімін тек шариғат тұрғысынан ғана емес, әлеуметтік жауапкершілікпен қарау қажет. Қазақстан ажырасу бойынша әлемде алдыңғы орында тұр. Бұл – қоғам үшін үлкен қасірет. Отбасы дегеніміз – шағын мемлекет. Әр отбасы мықты болған сайын мемлекет те нығаяды, — дейді теолог.

Ол қазіргі қоғамда некесіз, жасырын қарым-қатынастар көбейіп кеткенін айтады. Сондықтан шариғатқа сай, ашық әрі жауапкершілікпен екінші әйел алу – әлдеқайда әділетті жол деп есептейді.

— Бүгінде 3 емес, одан да көп әйелі барлар бар. Алайда олар некелеспей, жасырын өмір сүріп жүр. Мұның орнына шариғат заңымен екінші әйел алып, жауапкершілік арқалағаны жөн. Бұл – біздің ата-бабаларымыз ұстанған жол. Мысалы, Абылай ханның бірнеше әйелі болғанын көпшілік біледі, — дейді Исаұлы.

Алайда ол шариғатта “екінші әйел алу – міндет” деген талап жоқ екенін баса айтты. Керісінше, бұл – үлкен жауапкершілік пен әділеттілікті талап ететін амал.

— Бірінші әйелдің өзін асырай алмайтын, еңбекке құлқы жоқ, жалқау еркекке шариғат екінші әйел алуға рұқсат бермейді. “Жатып ішер” еркектер көбейді. Бұл дұрыс емес. Құранда: “Егер әділ бола алсаңдар, екінші әйел алыңдар” деп жазылған. Бірақ әділ болу – оңай шаруа емес, — деді теолог.

Мұхиддин Исаұлының айтуынша, мемлекет азаматтарға ортақ жағдай жасайды, ал рухани өмір – әр адамның өз жауапкершілігі.