Астанада «Astana Open Dialogue» пікірталас алаңында жаңа Салық кодексі талқыланды. Жоба жыл басынан бері қаралып келеді және әлі де қоғам мен мемлекет арасында түсініспеушілік тудырып отыр. Бұл мәселе бизнес, мемлекет және қоғам арасындағы тепе-теңдікті сақтау қажеттігін айғақтайды.
Мәжіліс депутаты Еркін Әбілдің айтуынша, жаңа кодексте барлық тараптардың мүддесі ескерілуі керек:
- Бизнес аз шығынданып, көбірек табыс тапқысы келеді.
- Мемлекет бюджет балансын сақтап, ресурстарды тиімді бөлуді көздейді.
- Қоғам бюджет қаражатының сұранысқа сай бөлінуін қалайды.
Депутаттың пікірінше, бұл тараптар арасында үйлесімді шешім табу – басты міндет. Мәжіліс салық кодексінің жеті негізгі бағыты бойынша өзгерістерді талқылауға дайын екенін мәлімдеді.
Пікірталасқа 200-ден астам қатысушы жиналып, салық жүйесі мен экономикаға әсер ететін жаңа жобаларды талқылады. Ұйымдастырушы Мейір Алпысовтың айтуынша, жобаға қоғамнан сын айтылуда, ал оның ел экономикасына әсері әзірге түсініксіз. Сондықтан ашық сұқбат форматындағы мұндай талқылаулар маңызды.
