Сауалда еліміздегі диабетпен ауыратын науқастар санының өсуі мен денсаулық сақтау жүйесінің тиімсіздігі айтылды.
«Қазіргі таңда елімізде қант диабетімен 500 мыңнан астам науқас тіркелген. Алайда, науқастардың 50%-ы анықталмаған және Ұлттық регистрге енгізілмеген. Скрининг жеткіліксіз деңгейде, диспансерлік бақылаудағы науқастардың тек 22%-ы HbA1c көрсеткішінің мониторингінен өтеді,» — деді депутат.
Сонымен қатар, жыл сайын бұл ауруға 204,5 миллиард теңге жұмсалып, оның 70%-ы асқынуларды емдеуге кететіні атап өтілді.
Жүйелі кемшіліктердің бірі ретінде ұлттық бағдарламаның жоқтығы, халықтың диабеттің алдын алу туралы хабардарлығының төмендігі және дәрі-дәрмекпен қамтамасыз етудегі қиындықтар көрсетілді.
Депутат өз сауалын мына ұсыныстармен толықтырды.
- Қант диабетінің алдын алу және ерте анықтау бойынша ұлттық бағдарлама әзірлеу.
- HbA1c негізінде тұрақты скрининг жүргізуді енгізу.
- С.Д. Асфендияров атындағы ҚазҰМУ базасында эндокринология ғылыми орталығын құру.
- Халықты ақпараттандыру мен алдын алу шараларын күшейту.
«Бұл мәселе тек медициналық емес, әлеуметтік және экономикалық мәселе. Егер жүйелі өзгерістер енгізбесек, науқастар саны мен шығындар арта береді,» — деп түйіндеді Жанна Асанова.
