Атырау облысының экобелсенділері дабыл қағуда. Аталмыш өңірде су маржандары әлі күнге дейін қырылып жатыр. Жергілікті билік өкілдері болатын болса,
тасқыннан кейінгі су жолдарында қалып қойған шабақтарды құтқару жаз айларынан бері тоқтатылмағанын жеткізуде, деп хабарлайды Kaztoday.kz.
Елеуді су тасқынынан кейін Атырау іргесіндегі каналдардың бойында көптеген шабақтар қалып қойған. Осы уақытқа дейін тірі қалғаны өсіп, ірі балыққа айналып та үлгерген. Алайда, әр жердегі шалшық суларда арам өліп жатқан шабақтардың көптігі сонша, жинап алу мүмкін емес. Қырылып жатқан балықты құтқаруға еріктілер, балық инспекциясы мамандары жұмылдырылған дейді жауаптылар. Алайда бәрін сақтап қалу мүмкін болмай жатыр екен. Дегенмен күні бүгінге дейін 95 миллионға жуық балық Жайық өзеніне жіберіліпті.
“Топан судан биыл Атырау облысының су айдынында, кесіліп қалған каналдарымызда көп мөлшерде шабақ қалып қойды. Маусым айынан шабақтарды құтқару жүргізілуде. Жалпы маусым айынан бастап Атырау облысында 95 миллионға жуық шабақтар құтқарылып, Жайық өзеніне жіберілді”, — деп мәлімдеді Атырау облысы балық шаруашылығы басқармасының басшысы Артур Сәдібекұлы.
