Төрт жасар бала 39 шар жұтып қойған, деп хабарлайды kaztoday.kz.
Ақмола облыстық балалар ауруханасының дәрігерлері баланың ішегінен 39 магниттік шарды шығарып алды.
Денсаулық сақтау министрлігінің мәліметінше, ауырған бүлдіршін дереу Зерендіден балалар ауруханасына жеткізілген. Оның іші ауырып, қайта-қайта құса берген. Рентенге түсіріп, тексеру кезінде ішегінен бөгде заттар бары байқалған.
Балалар хирургы Сәлімжан Жақыповтың сөзінше, пациентке 5 сағат бойы ота жасалған.
«Баланың тоқ ішегі мен аш ішегі зақымдалып, перфорация мен перитонит тудыратын 39 магниттік шарик болды. Бөгде заттарды алып тастау және оның салдарын жою ауыр зақымдануға байланысты күрделене түсті», — деді дәрігер.
Операцияны хирургия бөлімшесінің меңгерушісі Ернар Қожабеков бастаған тәжірибелі мамандар жасаған.
Ақ халаттылар осылайша кәсіби біліктілігін дер кезінде қолданып, кішкентай баланың өмірін арашалап алған.
