Мәжілістің жалпы отырысында бірқатар заңдар қаралды, деп хабарлайды Kaztoday.kz.
Соның ішінде Бюджеттік кодекс екінші оқылымнан өтіп, Сенатқа жіберілетін болады.
Бұл туралы ҚР Парламенті Мәжілісінің депутаты Еділ Жаңбыршин мәлімдеді.
«Бюджеттік кодексте елге қажетті бірнеше нормалар қабылданды. Соның екеуіне тоқталғым келеді. Өткенде Үкімет келген кезде мен бір мәселе көтерген едім. «Самұрық Қазына», басқа да квазимемлекеттік кәсіпорындардың дивиденттерін заңмен бекітіп, респуликалық бюджетке бір бөлігін аудару жөнінде. Осы норма қайтадан талқыланып, жұмыс тобында, тиісті комитетте Мәжіліс басшылығы арнайы жиналыс өткізіп, депутаттардың қолдауымен қабылданды», – деді Еділ Жаңбыршин.
Ендігі жерде «Самұрық Қазына» әл-ауқат қорының таза дивидентінің 50 пайызы, басқа квазимемлекеттік мекемелердің дивидентінің 70 пайызы республикалық бюджетке аударылатын болады. Бұл заңмен бекітілді.
«Яғни, өзіміздің пайдалы қазбалардан немесе басқа да операциялардан түсетін таза дивидент республикалық бюджетке жөнелтілетін болады. Түскен қаржы елдің, халықтың мәселесін шешуге жұмсалады. Әлеуметтік мәселелер мен инфрақұрылымды дамытуға бағытталатын болады», – деді ол.
Тағы бір өзекті норма – қоршаған ортаға зиян келтірген кезде төленетін айыппұлдарды жергілікті бюджетке төлету.
«Мұнай секторының айыппұлдары Ұлттық қорға, басқа да жер қойнауын пайдаланушы компаниялардың айыппұлдары республикалық бюджетке кететін еді. Енді қай жерді бүлдірдің, айыппұл сол жердің бюджетіне түсетін болады», – деді депутат.
