Бензин бағасы бір жарым есе қымбаттауы мүмкін, деп хабарлайды Kaztoday.kz.
Бүгін Премьер-министр Олжас Бектенов жанармай мен дизель отыны бағасының өсуі туралы ескертті. Бағаның көтерілуі мұнай-газ саласына инвестициялар тарту қажеттілігімен және жанармай тапшылығын шешумен байланысты.
АИ-92 маркалы бензиннің бағасы айтарлықтай өсуі ықтимал. Энергетика министрі Алмасадам Сәтқалиевтің айтуынша, оның құны 300 теңгеге дейін жетуі мүмкін.
«Қазіргі кезде литрінің шекті бағасы 205 теңгені құрайды. Алайда нарықтық механизмдерге көшу арқылы бұл баға көршілес нарықтармен теңесуі тиіс. Мысалы, Ресей нарығында бензин 290–300 теңге шамасында. Біз инфляция коридорына сүйенеміз. Бензин бағасының нақты қаншаға көтерілетінін айту қиын, бірақ бұл процесс біртіндеп жүзеге асады. Әзірге нақты алгоритм жоқ — түзетулер апта сайын немесе ай сайын болуы мүмкін», — деп мәлімдеді министр.
Сәтқалиевтің айтуынша, баға өзгерісі бойынша шешім сарапшылармен және нарық өкілдерімен келіссөздер нәтижесіне байланысты болады.
