Шымкенттің «Восток» шағынауданындағы жалдамалы пәтерде 4 жастағы ұл бала мен 15 жастағы қыз қайтыс болды. Алдын ала мәлімет бойынша, олар иіс газынан уланған.
Пәтерде екі отбасы тұрған. Зардап шеккендердің бірі туыстарына хабарласып, көмек сұраған. Оқиға орнына жеткен дәрігерлер екі баланың көз жұмғанын анықтады.
Тағы үш адам зардап шеккен. Қазір 27 жастағы әйел мен оның үш жасар қызы ауруханада жатыр. Қыз бала жансақтау бөлімінде, ал үшінші зардап шегуші үйіне шығарылған.
Көршілер қайғылы жағдайға ескі газ құрылғысы мен желдету жүйесінің ақауы себеп болуы мүмкін деп есептейді. Алайда QazaqGaz Aimaq мамандары бұл болжамды растаған жоқ. Тексеру барысында газ анықталмаған.
Оқиғадан кейін пәтер мөрленіп, үй газдан ажыратылды. Қайғылы жағдайдың нақты себебі анықталып жатыр.
