Қызылорда облысында экономикалық өсім жоғары. Ал облыс бюджеті 750 млрд теңгеден асқан, деп хабарлайды Kaztoday.kz.
Бұл жөнінде Мемлекет басшысы Қасым-Жомарт Тоқаевтың төрағалығымен өткен Үкіметтің кеңейтілген отырысында Қызылорда облысының әкімі Нұрлыбек Нәлібаев мәлімдеді.
«Аймақтың экономикалық өсімі 7 пайызды құрады (2023 жылы – 107,3%). Өзіңіздің, Үкіметтің қолдауымен облысымыздың бюджеті 750 млрд. теңгеден асты.
Экономиканың негізгі үлесін алатын мұнай қорының 15 жылдан астам уақыттан бергі төмендеу тенденциясын ескеріп, өңдеу өнеркәсібі мен аграрлық саланы жедел дамытумен қатар, мұнай-газ өңдеу саласын да өркендетудеміз.
Жаңа кен орындарын ашу үшін геологиялық зерттеулер жүргізіліп, мұнайдың төменгі қабаттары игерілуде. Кен орындарында 5 500 метр тереңдікке дейін (скважина) бұрғылау, дәстүрлі емес (қара тақтатас мұнай) көмірсутекті игеру басталды», – деді Н.Нәлібаев.
Н.Нәлібаевтың сөзінше, Сыр өңірінде негізгі капиталға 640 млрд. теңге инвестиция тартылып, өсім 21,7 пайызға жеткен (республиканың орташа көрсеткішінен 14 пайызға жоғары, ҚР – 107,5%).
Оның 70,5 пайызы – жеке инвестиция. Шетел инвесторларымен нәтижелі жұмыстың арқасында 9 ай қорытындысымен 171 млн доллар көлемінде тікелей инвестиция тартылды.
Өсім – 16,6 пайыз.
