2024 жыл алтынға инвестиция жасағандарды қуантқан жыл болды, деп хабарлайды Kaztoday.kz.
Өйткені кейінгі он жылда мұндай өсім болмаған. Қаңтар мен желтоқсан аралығында бұл қымбат металл бағасы долларға шаққанда 30 пайызға қымбаттаған. Бұл қарқын 2025 жылы жалғаса ма? Аналитиктер қандай болжам жасап отыр? Осы туралы айтайық.
Эксперттер мен нарық қатысушыларының болжамына қарасақ, алтын бағасы биыл да былтырғы қарқынды сақтап, өсе беруі мүмкін. Goldman Sachs бен Bank of America банкирлері бір унция бағасы 3 мың доллардан асып жығылуы мүмкін деп отыр. Ал алтынға қатысты Дүниежүзілік кеңес болса, қымбат металл бағасы өскенімен, дәл 2024 жылдағыдай қарқын болмайды деген болжам жасаған.
Жалпы алғанда сарапшылардың сөзіне сүйенсек, алтын бағасының динамикасы АҚШ президенті Дональд Трамптың саясатына, Таяу Шығыс пен Украиндағы ахуалға және дамушы елдердің Орталық банктерінің әрекеттеріне байланысты болады дейді.
Былтыр жыл аяқталар тұста Bank of America (BofA) алтын бағасы 2025 жылы қалай болуы мүмкін екеніне болжам жасаған еді. BofA аналитиктерінің ойынша, бір унция 3 мың доллар тұратын күнге таяп келеміз. Бірақ инвесторларға темірдей төзім керек екен.
Өйткені бұл шамаға жеткенше кемінде жарты жылдай уақыт қажет деседі. BofA-ның металдар нарығына қатысты болжам жасайтын бас сарапшысы Майкл Видмердің сөзіне сүйенсек, «әзірге инвесторларды жаппай нарыққа оралуға итермелейтін анық бір факторларды атап өту қиын». Банк экономистері жыл басында алтын бағасы аса өспеуі мүмкін.
Себебі Қытай тарапынан сұраныс соншалықты көп емес. Ал батыстық инвесторлардың назарына алтыннан гөрі мөлшерлемесі жоғары облигациялар мен күн санап қымбаттап жатқан долларда болып тұр. «Әрі қазіргі уақытта Дональд Трампның әкімшілігі саясатты экономикалық өсім қарқынын күшейтуге бұрып, инфляцияны жеделетіп жіберуі мүмкін. Осылайша доллар курсы күшейеді. Осылай жалғаса берсе, онда инвесторлар алтын алуға онша қызықпай қалуы мүмкін» дейді BofA аналитиктері.
Одан қала берді макроэкономикалық ахуал да қазір түсініксіз. Бюджет және салық саласындағы жағдай да бұлыңғыр болып тұр. Шетелдік Орталық банктерде Американың мемлекеттік облигациялары айтарлықтай көп. Десе де, бюджет және салық саласындағы ахуалға байланысты олар қоржынындағы алтын валютасын әртараптандырып, жаңадан алтын алуы әбден мүмкін.
Дереккөз: Курсив
