Ұлы Отан соғысы ардагеріне қойылған бюст құлап, жеті жасар қыздың өмірін қиған қайғылы оқиғаға қатысты тергеу нәтижелеріне марқұмның әкесі қанағаттанбай отыр, – деп хабарлайды Kaztoday.kz Orda.kz-ке сілтеме жасап.
Еске салсақ, қайғылы оқиға 2024 жылдың жазында Атырау қаласындағы Жеңіс саябағында болған. Әкесімен серуендеп жүрген жеті жасар қыз құлаған ескерткіштің астында қалып, көз жұмған.
Марқұмның әкесі Айдос Сабыров тергеу барысында маңызды жайттардың ескерілмегенін айтып, барлық кінәлілердің әділ жазалануын талап етуде.
Оның айтуынша, бұл оқиғаға тек ескерткішті жасаған және орнатқан мердігер ұйым ғана емес, сондай-ақ сол уақытта қала әкімінің орынбасары қызметін атқарған Ұлықбек Тналиев те жауапты болуы керек. Себебі ол мердігер ұйымдардың жұмысына тікелей жауапты болған.
– «Ол (Тналиев) тіпті ескерткіштің ашылуына қатысты. Бірақ қазір қылмыстық іс тек мердігер ұйымға қатысты қозғалды, ал шешім қабылдаған адамдар жазасыз қалуда. Тергеу аяқталып қалды, алайда оның жабылып қалу қаупі бар. Тналиев тіпті көңіл айтуға да жарамады, ал ол осы оқиғаға байланысты Атырауға тергеуге келген болатын», – дейді Айдос Сабыров.
Ал полиция өкілдері тергеудің қазіргі барысы туралы ақпарат берді.
– «Қылмыстық іс бойынша тергеу аяқталды, барлық қажетті процедуралардан кейін іс сотқа жіберіледі», – деп хабарлады Атырау облыстық полиция департаменті.
