Алматы облысында Жамбыл мен Батан ауылдарының арасында ресми түрде жоқ елді мекен бар. Ол карталарда белгіленбеген, GPS жүйесінде тіркелмеген, деп хабарлайды Kaztoday.kz.
Бұл жердің тұрғын үйлері ешқандай деректер базасында жоқ. Сол себепті такси, жедел жәрдем және төтенше жағдай қызметтері оларды таба алмайды – өйткені ресми мекенжайлары жоқ, деп хабарлайды Almaty TV.
Атаусыз елді мекенде шамамен 300 адам тұрады. Онда көшелер жоқ, жолдар мен орталық коммуникациялар тартылмаған. Тұрғындар бұл елді мекенді 15 жылдан бері заңдастыруға тырысып келеді, алайда еш нәтиже шықпаған.
– «Біз тұрақты тіркеуге тұра алмаймыз. Біздің еш жерде тіркелмегеніміз соншалық, Қазақстанда жоқ секілдіміз. Жер телімдерін жарнама арқылы сатып алғанбыз. Бұл – Қарасай ауданы. Бізде мемлекеттік актілер бар. Барлық құжаттарды өзіміз заңдастырдық. Барлық салықтарды да адал төлеп отырмыз», – дейді осы жерден 14 жыл бұрын жер сатып алған әйел.
Тұрғындар Қарасай ауданы әкімдігіне және облыстық сәулет және қала құрылысы департаментіне бірнеше рет жүгінген. Олар елді мекенге ресми атау беруді сұраған. Алайда шенеуніктер мұны тек халық саны 5000 адамға жеткенде ғана жасауға болатынын айтқан.
– «Бізге оның керегі жоқ. Тек көшелердің атауын берсе болды. Бұл жерде бар болғаны 60 үй ғана», – дейді тұрғындар.
Қарасай ауданының сәулет және қала құрылысы бөлімі бұл тұрғын массивін жақын маңдағы ауылға қосу жұмыстары жүргізіліп жатқанын хабарлады. Алайда қашан ресми мәртебе берілетіні белгісіз.
– «Қазір кезең-кезеңімен жұмыстар жүргізіліп жатыр. Елді мекеннің шекаралық сызбалары дайындалып, бас жоспар әзірленеді. Кейін барлық схемалар жинақталып, Алматы облысының сәулет басқармасына бюджет өтінімі беріледі. Олар тендер жариялағаннан кейін жобалық ұйымдар анықталады. Солар бас жоспарды жасайды», – деп түсіндірді бөлім маманы Дармен Жапаров.
Құқықтық мәселеден бөлек, жергілікті халықты мектепке баратын қалыпты жолдың жоқтығы алаңдатады. Өйткені мектеп өзеннің арғы бетінде орналасқан, ал оған жетудің жалғыз жолы – құбырдың үстімен жүру.
Ресми мәртебесі жоқ елді мекеннің тұрғындары қарапайым тұрмысқа қажетті жағдайлардан да қағылып отыр.
