Жамбылда күдіктіні азаптаған лауазымды полицейге қатысты тергеп-тексеру жұмыстары жүргізілуде, деп хабарлайды Kaztoday.kz.
Жамбыл облысы, Тұрар Рысқұлов ауданы полиция бөлімі бастығының орынбасары қылмыстық іс бойынша күдіктіні азаптаған.
Аталмыш дерек осы жылдың 29 қаңтарында Жамбыл облысының прокурорлары бейнебақылау камералары арқылы азаматтардың конституциялық құқықтарының сақталуын тексеру барысында белгілі болған.
Қазіргі уақытта Жамбыл облысының прокурорлары азаптау фактісі бойынша ҚК-нің 146-бабы, 2-бөлігі бойынша (қатыгез, адамгершілікке жатпайтын немесе қадір-қасиетті қорлайтын қарым-қатынас, азаптаулар) тергеп-тексеруді бастады.
Ал күдіктіні қинаған лауазымды полиция қызметкері ұсталып, уақытша ұстау изоляторына қамалды.
Жамбыл облыстық прокуратурасы қылмыстық процесте адамның құқықтарын қатаң сақтауға шақырады және азаптаулар жасағаны үшін ең ауыр жаза 12 жылға дейінгі мерзімге бас бостандығынан айыру көзделгенін ескертеді.
