Түзеу мекемесінде жазасын өтіп жатқан сотталған жаңа бір қылмыс жасаған, деп хабарлайды kaztoday.kz.
Жетісу облысы Талдықорған қалалық соты №71 түзеу мекемесінде жазасын өтеп жатқан сотталған «Ж»-ға қатысты тағы бір үкім шығарды.
Бұған дейін аса ауыр қылмысы үшін 25 жылға бас бостандығынан айырылған «Ж» жаңа бір қылмыс жасаған. Ол терроризм актісі туралы көрінеу жалған хабарлама жіберген. 112, 103 және 102 шұғыл қызметтеріне қоңырау шалып, №25 орта мектепте және автовокзалда жарылғыш заттардың қойылғанын айтып, автовокзалға дереу жедел жәрдем бригадаларын жіберуді талап еткен.
Тексеру барысында аталған мекен-жайдан жарылғыш заттар табылмады.
Сот оны Қылмыстық Кодекстің 273-бабы, яғни терроризм актісі туралы көрінеу жалған хабарлағаны үшін кінәлі деп танып және 2 жыл 6 айға бас бостандығынан айыру жазасын тағайындады.
Бұдан алдыңғы үкім бойынша өтелмеген жазаның ішінара қосылуын ескере отырып, соңғы жаза 25 жылға бас бостандығынан айыру болып белгіленді.
Сот үкімі заңды күшіне енді.
