Әзербайжандық кәсіпкер Ақтаудағы ұшақ апатынан қаза тапқан қазақстандықтардың отбасына пәтер сыйлады, деп хабарлайды kaztoday.kz.
Ақтауда Azerbaijan Airlines ұшағы апатынан қаза тапқандарды еске алу ас өткізілді. Шараны Қазақстан мен Әзербайжанның елшіліктері ұйымдастырды. Жиында кәсіпкер Амиль Юсифовтың бастамасы ерекше назар аудартты.
Қолдау көрсету белгісі ретінде әзербайжандық кәсіпкер Алматыдан бес екі бөлмелі пәтерді қаза тапқан қазақстандықтардың отбасыларына сыйға тартты. Жаңа тұрғын үйлер толықтай жиһазбен және тұрмыстық техникамен жабдықталған. Сонымен қатар, Юсифов Қазақстанға үш көлік табыстады – олар Маңғыстау облыстық ТЖД, қалалық аурухана және жедел жәрдем станциясына берілді.
Маңғыстау облысының әкімі Нұрдәулет Қилыбай кәсіпкердің қолдауына алғыс білдіріп, бұл игі бастаманың Қазақстан мен Әзербайжан арасындағы берік достықтың тағы бір символына айналғанын атап өтті.
AZAL ұшағының апатына қатысты сарапшы Серік Мұхтыбаев пікір білдірді. Ол Embraer 190 ұшағының құсқа соқтығысуы апаттың себебі болуы мүмкін деген нұсқаны жоққа шығарды.
