Қаңтар оқиғасы кезінде археологқа оқ атқан подполковник сотталды, деп хабарлайды kaztoday.kz.
Алматының әскери соты Ұлттық ұланның 5571 әскери бөлімінің подполковнигі Айтжан Әубәкіровке үкім шығарды.
Қаңтар оқиғасы кезінде 49 жастағы алматылық ер адамның денесі табылған. Кейін оның археолог Ерлан Жағыпаров екені анықталған. Марқұмның жақындары 6 қаңтарда оның жоғалғанын хабарлаған. 12 қаңтар күні оның қаза тапқанын білген. Ол қолына кісен салынған, аяусыз соққыға жығылған, жүрек тұсынан оқ атылған күйде табылған.
Соттың мәліметінше, Әубәкіров 2022 жылы 6 қаңтарда Алматы қаласында Ерлан Жағыпаров пен Әуез Қапсалановқа оқ атқан. Сот барысында медициналық сараптама нәтижелері айтылды. 30-дан астам куәгер сұралған.
Алғашқы сот отырысы былтыр 19 желтоқсанда басталған болатын. Бірақ бірнеше сот процесінен кейін сот жабық өткізілді. БАҚ өкілдері сот залына кіргізілмеді. Сот мұны ұлттық қауіпсіздік пен мемлекеттік құпияларға қатысты ақпараттың барлығымен түсіндірді.
Алматы горнизоны әскери соты Айтжан Әубәкіровты Қылмыстық кодекстің 451-бабы, яғни билігін асыра пайдалану бойынша кінәлі деп тапты. Осылайша ол 7 жылға бас бостандығынан айырылды. Сондай-ақ археологтың отбасына 20 миллион теңге, екінші жәбірленуші Қапсалановтың отбасына моральдық шығын өтейді.
