2024 жылдың 20 қарашасында белгілі адвокат Бауыржан Азанов Алматыдан Астанаға ұшып келген сәтінде, тікелей әуежайда үш белгісіз ер адамның шабуылына ұшырағанын мәлімдеді, деп хабарлайды Kaztoday.kz.
Оқиға кешкі сағат 19:00 шамасында орын алған. Кейінірек анықталғандай, бұл адамдар шетел азаматтары болып шыққан.
Адвокаттың айтуынша, олар оның беті мен басына ауыр соққы тигізуге тырысқан. Алайда, ол соққыдан жалтарып, ауыр жарақат алмаған. Бұл оқиға Астана әуежайындағы бейнебақылау камераларына түсіп қалған.
Оқиға орнына жеткен полиция қызметкерлері тергеу амалдарын бастап, қылмыстық іс қозғаған. Күдіктілер анықталып, олар бірден күдікті ретінде танылған. Алайда, адвокат Азановтың айтуынша, оқиға қарапайым бұзақылық емес, алдын ала ойластырылған шабуылға көбірек ұқсайды.
22 желтоқсанда, яғни оқиғадан бір ай өткен соң, адвокат Азановпен Астанада белгісіз адам кездесіп, оған 5 миллион теңге көлемінде пара ұсынып, өзінің берген түсініктемесін өзгертуін талап еткен. Адвокат бұл ұсыныстан бас тартқан кезде, әлгі адам «сен алмасаң, басқалар алады» деп, құқық қорғау органдарының әрекеттеріне меңзегенін жеткізді.
Арада екі-үш күн өткенде полиция қызметкерлерінің адвокатқа деген көзқарасы күрт өзгерген. Оның айтуынша, кейбір лауазымды тұлғалар оны кінәлі етуге тырысқан. Тіпті, күдіктілерді жақтайтын «куәгерлердің» пайда болғанын да алға тартты.
Бұл жағдайдың ашық дәлелдері болса да, қылмыстық іс 3 айдан астам уақыттан бері еш ілгерілемей тұр. Күдіктілерге ресми айып тағылмаған, олар тіпті елден кетуге мүмкіндік алған. Адвокаттың пікірінше, бұл жағдай еліміздегі құқық қорғау органдарының ішінде сыбайлас жемқорлықтың бар екенін көрсетеді.
Адвокат Азанов Бас прокуратураға, Ішкі істер министріне және ІІМ-нің Өзіндік қауіпсіздік департаментінің басшылығына үндеу жасап, тергеудің әділ жүргізілуін және құқық қорғау органдарының әрекеттерін бақылауға алуды сұрады.
Адвокат Бауыржан Азанов қылмыстық істі жүргізуге жауапты қызметкерлердің шешімдеріне тәуелсіз тексеру жүргізілуін талап етіп отыр.
